PDA

View Full Version : السينما الواقعية و افلام العيد


M.Hamdi
12-22-2007, 02:58 PM
بناء على رغبه العضو كمال حسن

هو مش بيعرف يفتح توبيكات ..فيشرفنى طلبه انى افتحه له

The lion king
12-22-2007, 03:03 PM
هى الظاهر هتبقى موضه

انحسار السينما الكويديه او المضحكون نوعا ما

وبروز السينما الواقعيه او الاجتماعيه

انا شفت فيلم حين ميسره

hugojungle
12-22-2007, 03:07 PM
قصدك حين مسخره
:mad:

The lion king
12-22-2007, 03:10 PM
hugojungle,

عندك حق

انا مش عارف المشاهد دى لو يستغنوا عنها مش هيخسروا حاجه..لكن لازم عشان الايرادات

لكن الفيلم بيلقى الضوء على المهمشين..وعلى سكان العشوائيات

Red Alert
12-22-2007, 03:11 PM
ماذا عن فيلم "خارج عن القانون"؟ أسمع إنه التاني في الإيرادات بفرق مش كبير عن "الجزيرة"..حد فيكم شافه؟

كمال حسن
12-22-2007, 03:13 PM
:twisted:

amr farok
12-22-2007, 03:16 PM
عوده لسينما عاطف الطيب

السينما فى 2007 هى رصد واقعى لحاله البلد ( حين ميسره / موضوع زينهم و العشوائيات) - ( الجزيرة / قضيه امبراطور النخيله عزت حنفى) - ( هى فوضى / رصد لأنحرافات السلطه و الداخليه)

أنا شايف انها افلام هادفه مع اعتراضى لأسلوب المعالجه فى فيلم حين ميسرة

و لكن يبقى الجزيرة هو افضل الافلام العربيه لعام 2007 مع تشابهه مع فيلم الهروب لأحمد ذكى :?: :?: :?:

منصور الحنفى و بس :mad:

malek el masry
12-22-2007, 03:21 PM
هي ليست سينما واقعية و انما اكشنة الواقع ووضعه في قوالب السينما الهولييودية الجاهزة او قوالب الشعارات السياسية الفجة

يعني هيه فوضي ده عبارة عن مقال سياسي ضحل لمخرج تافه اسمه خالد يوسف بيعتنق المذهب الناصري

مش حتكلم عن الخطابية الزاعقة للفيلم ولا عن الدعاية الفجة اللي الفيلم عملها لحمدين صباحي ولا عن النهاية الشديدة السذاجة و الابتسار و الافتعال لكن الفيلم ضعيف فنيا لان شخصياته ليست بشر من لحم و دم و لكن قوالب وتيبات جامدة غير خاضعة لاي صراع درامي يعكس مشاعر و تجارب انسانية حقيقية و صادقة

الفيلم فقير في الشكل و المضمون وهو لا يحمل اي شئ من يوسف شاهين و انما كله لخالد يوسف المهندس الذي ضل طريقه لعالم السينما

و من هنا تبدو التفاهة و الفجاجة مفهومة

حين ميسرة ماشفتوش

اما الجزيرة فما هو الا تحويل قصة عزت حنفي امبراطور النخيلة(و هي دراما انسانية حقيقية و لها دلالاتها الاجتماعية و السياسية المهمة في سياق الواقع المصري) الي فيلم علي الطراز الهولييودي

malek el masry
12-22-2007, 03:25 PM
من الظلم الشديد مقارنة فيلم هولييودي زي الجزيرة لفيلم عظيم زي
الهروب

لكن الجرم الافدح في رايي هو مقارنة الافلام دي ووضعها في كفة واحدة مع سينما عاطف الطيب و محمد خان(اللي كانت سينما بجد وواقعية بجد

M.Hamdi
12-22-2007, 03:25 PM
malek el masry,

ايه رايك فى خالد صالح ؟ عموما وفى الفيلم



ناوى ان شاء الله اتفرج على الفيلم عشانه

Red Alert
12-22-2007, 03:30 PM
قد تكون هذه الأفلام مصنوعة بشكل جيد جداً وبمجهود كبير .. لكن أليس من التسرع أن نحكم على تلك الأفلام بأنها واقعية من عدمه من دون تحليلها بشكل موضوعي؟

Abo 7abiba
12-22-2007, 03:33 PM
هى فوضى

فيلم دخلته تانى يوم عرضه ودخلته تانى قبل العيد بيومين

فيلم جامد جدا

حين ميسرة والجزيرة وفيلم كريم عبد العزيز اكيد هدخلهم

hugojungle
12-22-2007, 03:39 PM
malek el masry,
انت زين و الله زين
:)

Ahmad Hesham
12-22-2007, 03:46 PM
Red Alert,

حاجز النهارده ميدنايت
عموما شكله مبشر جدا

:) :?:

raniawafik
12-22-2007, 03:47 PM
كمال حسن,


معلش أستفسار ولك حريه الرد
هو حضرتك صحفي ؟

The lion king
12-22-2007, 03:48 PM
كريم عبد العزيز ده استاذ

اكيد عامل حاجه ما حصلتش

malek el masry
12-22-2007, 03:48 PM
قد تكون هذه الأفلام مصنوعة بشكل جيد جداً وبمجهود كبير .. لكن أليس من التسرع أن نحكم على تلك الأفلام بأنها واقعية من عدمه من دون تحليلها بشكل موضوعي؟

مانا حللتها بشكل موضوعي فعلا
:)

سينما ضعيفة

malek el masry
12-22-2007, 03:50 PM
malek el masry,

ايه رايك فى خالد صالح ؟ عموما وفى الفيلم



ممثل جيد طبعا و رايي في الفيلم انا قلته

malek el masry
12-22-2007, 03:53 PM
Red Alert,

يدمج في توبيك سينما الواقعية هيا فوضي و حين ميسرة و الجزيرة

M.Hamdi
12-22-2007, 03:55 PM
ممثل جيد طبعا و رايي في الفيلم انا قلته


اقصد رايك فى خالد صالح فى الفيلم ..مش الفيلم :) :)

The lion king
12-22-2007, 03:56 PM
حين ميسره

بيتكلم عن سكان العشوائيات او المهمشين..اللى مححدش حاسس بيهم ولا بوجودهم ولا مهتم بيهم

زى ما عمرو عبد الجليل ما قال..دخلت الدنيا وهطلع ومحدش شافنى..وكويس انى ما خلفتش عشان ولادى ما يبقوش زيى

بيلقى الضوء على قيمهم..واخلاقهم..والبيئه اللى هم فيها..اللى هى كلها تخلف وجهل فساد وانحلال ..الى هتؤدى فى النهايه للتطرف والانحراف



مفيش حاجه اسمها حرام..مفيش حاجه اسمها عيب

بعض السلوكيات والمواقف فى الفيلم الناس استغربتها وقالت انها مبالغ فيها

لكن اللى شاف العشوائيات دى وشاف حياة الناس فيها..هيعرف فعلا ان اللى فى الفيلم موجود فى الحياة واكتر من كده كمان

طبعا عيب الفيلم الرئيسى الاسفاف والمشاهد الخارجه

Ahmad Hesham
12-22-2007, 03:57 PM
هى فوضى ده فيلم باختصار " فكسان " جدا
متفق مع مالك تماما فى رأيه عن الفيلم
الجزيرة مش قصة عزت حفنى اصلا
لان فى اول الفيلم كان فيه حوار بين خالد الصاوى و محمود عبد المغنى
و فى سياق الحوار الصاوى بيقوله
مش عايزين نكرر حكاية الخط او عزت حفنى من تانى

ملحوظة : اول مرة احمد السقا احس انه ممثل كان فى الفيلم ده

malek el masry
12-22-2007, 04:00 PM
كريم عبد العزيز ده استاذ

اكيد عامل حاجه ما حصلتش

هو كريم عبد العزيز بقي صانع افلام دلوقت؟ لا هو مخرج ولا هو كاتب سيناريو

ده مجرد ممثل يعني بينفذ فكر المخرج و المؤلف

كمال حسن
12-22-2007, 04:01 PM
:twisted:

كمال حسن
12-22-2007, 04:02 PM
:twisted:

malek el masry
12-22-2007, 04:04 PM
هى فوضى ده فيلم باختصار " فكسان " جدا
متفق مع مالك تماما فى رأيه عن الفيلم
الجزيرة مش قصة عزت حفنى اصلا
لان فى اول الفيلم كان فيه حوار بين خالد الصاوى و محمود عبد المغنى
و فى سياق الحوار الصاوى بيقوله
مش عايزين نكرر حكاية الخط او عزت حفنى من تانى

ملحوظة : اول مرة احمد السقا احس انه ممثل كان فى الفيلم ده

ماهي دي الخدعة يابوحميد


الفيلم طبعا مستوحي من سيرة امبراطور النخيلة لكن المؤلف يحط الجملة دي في الحوار عشان ينفي ان الفيلم ليه صلة بعزت حنفي

احمد السقا ممثل امكانياته متواضعة للغاية بس هي حظوظ

كمال حسن
12-22-2007, 04:04 PM
:twisted:

كمال حسن
12-22-2007, 04:06 PM
:twisted:

Ahmad Hesham
12-22-2007, 04:06 PM
malek el masry,

اها...الله ينور يا عمنا :) :?:
طبعا السقا امكانياته متواضعة جداااااااااااااااااااااااااااااااا
بس اشهد له انه حاول يأدى فى الفيلم ده

The lion king
12-22-2007, 04:07 PM
malek el masry,


هو كريم عبد العزيز بقي صانع افلام دلوقت؟ لا هو مخرج ولا هو كاتب سيناريو

ده مجرد ممثل يعني بينفذ فكر المخرج و المؤلف


يعنى عامل دور جامد اكيد

وانا باثق فى اختياراته للافلام..وشايفه موهبه جامده ومتكامله

كمال حسن
12-22-2007, 04:08 PM
:twisted:

Ahmad Hesham
12-22-2007, 04:09 PM
يالا اكمل بالليل معاكم ان شاء الله
عندى ماتش الاهلى فى الاستاد
و فيلم كريم فى السينما

سلام :) :???:

malek el masry
12-22-2007, 04:15 PM
malek el masry,
انت دمرت الأفلام والسينما المصرية عموما :)
غير انه من الظلم الفادح للسينما المصرية تقييمها بالقياس علي افلام عالميه وخصوصا السينما الأمريكا

يبدو انك اسات فهمي

انا كاره للسينما الامريكية و بالتحديد السينما الهوليوودية الطابع لان الافلام الامريكية الحلوة هي الافلام المتمردة علي التقاليد الهولييودية

انتقادي لفيلم الجزيرة مثلا و باقي افلام هذه المرحلة عموما انه بيقلد السينما الهولييودية

بينما سينما محمد خان و عاطف الطيب مثلا كان تاثرهم الاساسي بسينما الواقعية الجديدة في ايطاليا و سينما الموجة الجديدة في فرنسا بالاضافة الي افلام مخرجين امريكيين مجددين و ثوريين زي فرانسيس فورد كوبولا و مارتن سكورسيزي و سيدني لوميت و روبرت التمان و غيرهم

كمال حسن
12-22-2007, 04:16 PM
:twisted:

malek el masry
12-22-2007, 04:19 PM
malek el masry,


هو كريم عبد العزيز بقي صانع افلام دلوقت؟ لا هو مخرج ولا هو كاتب سيناريو

ده مجرد ممثل يعني بينفذ فكر المخرج و المؤلف


يعنى عامل دور جامد اكيد

وانا باثق فى اختياراته للافلام..وشايفه موهبه جامده ومتكامله

ليه خلتني احبك- حرامية في كي جي تو- حرامية في تايلاند- ابو علي-
محطة مصر

هي دي افلام برضه يابو ليون؟
:)

raniawafik
12-22-2007, 04:22 PM
كمال حسن,

أسلوبك بصراحه يدل علي كده

The lion king
12-22-2007, 04:26 PM
malek el masry,

فيام حراميه فى كى جى تو فيلم جامد من رايى

وكريم كان متالق فى الدور ده

فيلم تايلاند...فيلم كويس وخفيف

ابو على مش بطال

العامل المشترك ..تالق كريم فى الاداء

كمال حسن
12-22-2007, 04:28 PM
:twisted:

malek el masry
12-22-2007, 04:35 PM
malek el masry,

فيام حراميه فى كى جى تو فيلم جامد من رايى

وكريم كان متالق فى الدور ده

فيلم تايلاند...فيلم كويس وخفيف

ابو على مش بطال

العامل المشترك ..تالق كريم فى الاداء

كده يبقي انت من طريق و انا من طريق يا ابو ليون
:-p

The lion king
12-22-2007, 04:39 PM
malek el masry,
:lol: :lol:

هو لازم كل فيلم عشان يبقى كويس..يبقى ثورى..او سياسى..او دسم

لازم كل الافلام تبقى زى فيلم الارض مثلا نفس اللون ونفس القضايا

barby
12-22-2007, 04:40 PM
The lion king,

احسن فيلم لكريم هو واحد من الناس

yulanda
12-22-2007, 04:41 PM
The lion king,

هو لازم كل فيلم عشان يبقى كويس..يبقى ثورى..او سياسى..او دسم

لازم كل الافلام تبقى زى فيلم الارض مثلا نفس اللون ونفس القضايا


:?: :?:

barby
12-22-2007, 04:43 PM
كمال حسن,

وفيلم من نوعيه لورد اوف رينجس له سحر خاص وسحر العالم الرقمي الدخيل علي السينما الذي اضاف لها الكثير


ده بقى بالذات مش بحبه خالص

هو مجرد استعراض عضلات مش اكتر فى طريقة عمل الفيلم

انما لا قصة ولا حاجة

malek el masry
12-22-2007, 04:43 PM
malek el masry,
انا اختلف معك في هذه النقطه
انا استمتع كثيرا بالسينما ...فهي متعه لذيذه جدا وانا عاشق جدا لها
وخصوصا السينما الهوليوديه
الأفلام الجميلة تفرض نفسها
فيلم زي وداعا شاوشانك او فورست جامب لو اعادوه الف مرة يوميا لن أمل
وفيلم من نوعيه لورد اوف رينجس له سحر خاص وسحر العالم الرقمي الدخيل علي السينما الذي اضاف لها الكثير
بل افلام الانيميشن مثل بي وولف او انشانتيد لها سحر آخر
السينما عالم تفكير وسحر ورفاهيه هدفها الأول ليس الماده فقط بل اسعاد المشاهد

انا كنت بقول زيك كده برضه من 6 سنين لغاية لما عرفت و شفت السينما الحقيقية: السينما اللي بجد: اللي بتمتع النظر و تثري العقل و الوجدان و تطرح امامك التساؤلات و الافكار و تثير الاحاسيس و المشاعر

shawshank redemption
و فورست جامب افلام مش وحشة لكنها تاتي في ترتيب متاخر جدا علي قائمتي

لورد اوف ذا رينجز ده ليس علي قائمتي اصلا

barby
12-22-2007, 04:45 PM
A.Hesham,

انا مليش قوى فى الافلام الجديدة

لكن خالد صالح ده اسطورة والفرجة عليه متعة بصراحة :?:

malek el masry
12-22-2007, 04:46 PM
malek el masry,
:lol: :lol:

هو لازم كل فيلم عشان يبقى كويس..يبقى ثورى..او سياسى..او دسم

لازم كل الافلام تبقى زى فيلم الارض مثلا نفس اللون ونفس القضايا

انا ماقلتش كده خالص

فيلم ام العروسة مثلا انا بعتبره فيلم جميل

لكن افلام كريم عبد العزيز دي افلام تافهة في رايي

malek el masry
12-22-2007, 04:53 PM
A.Hesham,

انا مليش قوى فى الافلام الجديدة

لكن خالد صالح ده اسطورة والفرجة عليه متعة بصراحة :?:

هو ممثل جيد اكيد لكن كلمة اسطورة دي كبيرة شوية علي تاريخه و عطائه

امال محمود المليجي او محمود مرسي مثلا نقول عليهم ايه؟

M.Hamdi
12-22-2007, 05:01 PM
لكن خالد صالح ده اسطورة والفرجة عليه متعة بصراحة


مشروع اسطوره :) :)

كأنه فنان من الزمن الجميل ركب اله زمن وجالنا :) :)

اسلوبه وصوته ونظراته ملهاش علاقه خالص بالجيل الحالى ..متفرد

The lion king
12-22-2007, 05:06 PM
مش عارف...ساعات بحس ان خالد صالح واخد اكتر من حقه

يعنى فيه ممثل زى خالد زكى..انا شايفه موهبه كبيره بس مش واخد حقه

malek el masry
12-22-2007, 05:14 PM
The lion king,

خالد صالح واخد اكتر من حقه؟ دي انا معاك فيها و التفسير واضح انه طالع في جيل من الممثلين عديمي الموهبة فبيبان وسطهم انه مارلون براندو
:)

هو ممثل جيد لكنه مش محمود مرسي ولا احمد زكي مثلا

خالد زكي؟ دي مش معاك فيها

amr farok
12-22-2007, 05:23 PM
يعنى فيه ممثل زى خالد زكى..انا شايفه موهبه كبيره بس مش واخد حقه

مش معاك فيها دى يا ابو ليون

مع انه جارى لكن طول عمرى بحس ان وشه ليس لديه القدرة على التعبير الكافى ذيه ذى وجه لاعبى البوكر لا يعطيك اى انطباع

The lion king
12-22-2007, 05:41 PM
malek el masry,

ممكن صح..عشان مفيش حد كويس فمفيش غيره




خالد زكي؟ دي مش معاك فيها


amr farok,


مع انه جارى لكن طول عمرى بحس ان وشه ليس لديه القدرة على التعبير الكافى ذيه ذى وجه لاعبى البوكر لا يعطيك اى انطباع


مش عارف بس انا بحب اداءه الجدع ده

يعنى كنت شفت له مسلسل مع عزت العلاليلى مش فاكر اسمه

ودوره فى السفاره فى العماره مثلا..كان حلو اوى

ladyde
12-22-2007, 05:50 PM
خالد زكي بيفكرني مع الفارق بكيفين كوستنر

الملامح الجامدة

الأداء الرائع

ممثل كويس جدا

barby
12-22-2007, 05:51 PM
A.Hesham,

انا مليش قوى فى الافلام الجديدة

لكن خالد صالح ده اسطورة والفرجة عليه متعة بصراحة :?:

هو ممثل جيد اكيد لكن كلمة اسطورة دي كبيرة شوية علي تاريخه و عطائه

امال محمود المليجي او محمود مرسي مثلا نقول عليهم ايه؟

الموهبة بتبان برضه مش لازم احكم عليه بعد 20 سنة مثلا :)

نقطة مقارنته بالعمالقة زى المليجى ومرسى

ظالمة ليه جدا لانه لسه فى اول المشوار وممكن قوى يبقى زيهم كده

كمال حسن
12-22-2007, 06:25 PM
:twisted:

كمال حسن
12-22-2007, 06:30 PM
:twisted:

hugojungle
12-22-2007, 07:11 PM
فتحى عبد الوهاب فى رأيى ممثل كويس جدا

barby
12-22-2007, 08:20 PM
كمال حسن,


المليجي ومرسي لن يتكرروا


انا مقصدش انه هيكون نسخة منهم

لا طبعا كل واحد و له اسلوبه لكن اتوقع انه ميقلش نجومية و ثقل عنهم



فتحى عبد الوهاب فى رأيى ممثل كويس جدا


ده كمان حكاية

Melody33
12-22-2007, 08:36 PM
malek el masry,


هو كريم عبد العزيز بقي صانع افلام دلوقت؟ لا هو مخرج ولا هو كاتب سيناريو

ده مجرد ممثل يعني بينفذ فكر المخرج و المؤلف


يعنى عامل دور جامد اكيد

وانا باثق فى اختياراته للافلام..وشايفه موهبه جامده ومتكامله

ليه خلتني احبك- حرامية في كي جي تو- حرامية في تايلاند- ابو علي-
محطة مصر

هي دي افلام برضه يابو ليون؟
:)

أنا كنت لسه هأرد بنفس الرد تقريبا ... أحسن فيلم لكريم عبد العزيز فيلم المشبوه!

Melody33
12-22-2007, 08:38 PM
كمال حسن,

شكرا للتوبيك وللعزيز رمزى ... وأهلا وسهلا بحضرتك معانا فى المنتدى :???:

pecaso
12-22-2007, 08:40 PM
The lion king,

خالد صالح واخد اكتر من حقه؟ دي انا معاك فيها و التفسير واضح انه طالع في جيل من الممثلين عديمي الموهبة فبيبان وسطهم انه مارلون براندو
:)

هو ممثل جيد لكنه مش محمود مرسي ولا احمد زكي مثلا

خالد زكي؟ دي مش معاك فيها

كلامك صح :-x :-x

بس يعتبر احسن الموجودين لان مفيش حد موهوب

فيه فتحي عبد الوهاب بس بيظهر قليل

واحمد عزمي مشروع فنان كويس

ladyde
12-22-2007, 08:41 PM
أنا كنت لسه هأرد بنفس الرد تقريبا ... أحسن فيلم لكريم عبد العزيز فيلم المشبوه!

_________________

:mad: :mad: :mad:

Melody33
12-22-2007, 08:43 PM
ladyde,

:mad:

pecaso
12-22-2007, 08:43 PM
أنا كنت لسه هأرد بنفس الرد تقريبا ... أحسن فيلم لكريم عبد العزيز فيلم المشبوه!

_________________

:mad: :mad: :mad:

:-x :-x :-x

كريم عبد العزيز بيمثل بوسامته مش اكتر

لكن تعبير واداء مفيش

سبب انتشاره المثلث

احمد جلال اخراج

بلال فضل قصه وسيناريو وحوار

وهو كبطل

لكن مثلا فتحي عبد الوهاب او احمد عزمي افضل منه

Melody33
12-22-2007, 09:13 PM
pecaso,

فتحى عبد الوهاب ده ولد ... ناقص له بس فرصة حلوة بقصة وسيناريو ومخرج جامد وهيظهر قدراته ... لو حالفه الحظ ممكن يعمل تاريخ مشابه لتألق أحمد زكى.

أنما مين أحمد عزمى؟

monos
12-22-2007, 09:20 PM
انا مش بدخل سينما بس شكلهم افلام مقرفة و بتغم من غير هدف و بالذا ت خالد يوسف ويوسف شاهين بجد مزودينها قوىىىىىىىىىىى فى حاجات ملهاش لازمة

malek el masry
12-22-2007, 09:40 PM
خالد زكي بيفكرني مع الفارق بكيفين كوستنر

الملامح الجامدة

الأداء الرائع

ممثل كويس جدا

صح

هو زي كيفين كوستنر
الاثنين ميح في التمثيل

barby
12-22-2007, 09:44 PM
Melody33,

احمد عزمى كان ابن ماجدة زكى فى مسلسل عباس الابيض فى اليوم الاسود

malek el masry
12-22-2007, 09:49 PM
A.Hesham,

انا مليش قوى فى الافلام الجديدة

لكن خالد صالح ده اسطورة والفرجة عليه متعة بصراحة :?:

هو ممثل جيد اكيد لكن كلمة اسطورة دي كبيرة شوية علي تاريخه و عطائه

امال محمود المليجي او محمود مرسي مثلا نقول عليهم ايه؟

الموهبة بتبان برضه مش لازم احكم عليه بعد 20 سنة مثلا :)

نقطة مقارنته بالعمالقة زى المليجى ومرسى

ظالمة ليه جدا لانه لسه فى اول المشوار وممكن قوى يبقى زيهم كده

لما يبقي زيهم يبقي يتقال عليه اسطورة

كلمة اسطورة بتتقال مش علي واحد عنده موهبة فقط و لكن واحد عمل تاريخ كبير من العطاء و الادوار الابداعية

احمد مرعي كان من اكثر الممثلين موهبة لكنه لسبب او لاخر لم يقدم العطاء الذي يتناسب مع حجم موهبته

كان ممكن يبقي اسطورة لكنه مابقاش

malek el masry
12-22-2007, 10:01 PM
كمال حسن,


المليجي ومرسي لن يتكرروا


انا مقصدش انه هيكون نسخة منهم

لا طبعا كل واحد و له اسلوبه لكن اتوقع انه ميقلش نجومية و ثقل عنهم



فتحى عبد الوهاب فى رأيى ممثل كويس جدا


ده كمان حكاية

برضه الوصف فيه مبالغة شديدة
:)

Red Alert
12-22-2007, 10:12 PM
نار خالد صالح ولا جنة تامر عبد المنعم ، ونار منى زكي ولا جنة غادة عادل.. أعتقد إن غادة شلت محمد خان زي ما رضا الويشي اليومين دول بيشلنا .. :evil:

raniawafik
12-22-2007, 10:17 PM
Red Alert,

تامر عبد المنعم :shock: هو ده ممثل أساسا :o

malek el masry
12-22-2007, 10:18 PM
تامر عبد المنعم ، ونار منى زكي ولا جنة غادة عادل.. .. :evil:

دول دخلوا عالم التمثيل غلط اساسا

barby
12-22-2007, 10:45 PM
كمال حسن,


المليجي ومرسي لن يتكرروا


انا مقصدش انه هيكون نسخة منهم

لا طبعا كل واحد و له اسلوبه لكن اتوقع انه ميقلش نجومية و ثقل عنهم



فتحى عبد الوهاب فى رأيى ممثل كويس جدا


ده كمان حكاية

برضه الوصف فيه مبالغة شديدة
:)

يا ابنى انا ليا نظرة فى الناس :lol:

take my word

و بعدين انت مشفتش هو قد ايه كان مبدع فى الناس فى كفر عسكر
لدرجة انه غطى على السعدنى

Melody33
12-22-2007, 10:47 PM
Melody33,

احمد عزمى كان ابن ماجدة زكى فى مسلسل عباس الابيض فى اليوم الاسود

شكرا للتوضيح ولو أنى مش فاكر شكله :)

malek el masry
12-22-2007, 11:05 PM
كمال حسن,


المليجي ومرسي لن يتكرروا


انا مقصدش انه هيكون نسخة منهم

لا طبعا كل واحد و له اسلوبه لكن اتوقع انه ميقلش نجومية و ثقل عنهم



فتحى عبد الوهاب فى رأيى ممثل كويس جدا


ده كمان حكاية

برضه الوصف فيه مبالغة شديدة
:)

يا ابنى انا ليا نظرة فى الناس :lol:

take my word

و بعدين انت مشفتش هو قد ايه كان مبدع فى الناس فى كفر عسكر
لدرجة انه غطى على السعدنى

ايه كفر عسكر ده؟

الصراحة ما اقدرش اثق في نظرتك من بعد حكاية الشموع السوداء
:lol:

انا عارف فتحي عبد الوهاب كويس من ايام ماكان بيعمل مسرحيات علي مسرح الهناجر في التسعينات
و ماكانش لسه اشتهر

malek el masry
12-22-2007, 11:08 PM
Melody33,

احمد عزمى كان ابن ماجدة زكى فى مسلسل عباس الابيض فى اليوم الاسود

شكرا للتوضيح ولو أنى مش فاكر شكله :)

اللي كان ابن يحيي الفخراني الصغير في مسلسل حمادة عزو

و اهم ادواره كان اول ادواره
:)
في فيلم الابواب المغلقة اخراج عاطف حتاتة و بطولة محمود حميدة و سوسن بدر و انتاج عام 2000

barby
12-22-2007, 11:19 PM
malek el masry,


الصراحة ما اقدرش اثق في نظرتك من بعد حكاية الشموع السوداء



دى نظرتى فى الافلام انما الممثلين حاجة تانية :lol:

جربنى بس المرة دى 8-)

monomono
12-22-2007, 11:59 PM
malek el masry,


الصراحة ما اقدرش اثق في نظرتك من بعد حكاية الشموع السوداء



دى نظرتى فى الافلام انما الممثلين حاجة تانية :lol:

جربنى بس المرة دى 8-)اية يا باربى انتى ما بتحبيش الفيلم دة ولا اية :razz: :razz:

Melody33
12-23-2007, 12:03 AM
Melody33,

احمد عزمى كان ابن ماجدة زكى فى مسلسل عباس الابيض فى اليوم الاسود

شكرا للتوضيح ولو أنى مش فاكر شكله :)

اللي كان ابن يحيي الفخراني الصغير في مسلسل حمادة عزو

و اهم ادواره كان اول ادواره
:)
في فيلم الابواب المغلقة اخراج عاطف حتاتة و بطولة محمود حميدة و سوسن بدر و انتاج عام 2000

:-x :-x

أه كده أفتكرته ... ده أنا سميته أبراهيم من بعد حمادة عزو :lol: ... كان لايق قوى فى دور الشاب الغير مستقر نفسيا فى العمر ده ... ونفس الدور مع أختلاف بسيط أداه فى مسلسل العميل 1001

Melody33
12-23-2007, 12:05 AM
malek el masry,


الصراحة ما اقدرش اثق في نظرتك من بعد حكاية الشموع السوداء



دى نظرتى فى الافلام انما الممثلين حاجة تانية :lol:

جربنى بس المرة دى 8-)اية يا باربى انتى ما بتحبيش الفيلم دة ولا اية :razz: :razz:

لأ يامونمن أنت فاهمة غلط ... دى هى معجبة جدا بالفيلم ده :evil:

monomono
12-23-2007, 12:24 AM
طيب كويس دة انا بحب الفيلم دة اوى من قبل ما احب الكورة والأهلى
هو صحيح فيلم عربى اووووى بالنهاية السعيدة لكنة كويس واغانية حلوة اوى
Melody33
بس هو انت مضايق اوى كدة لية :lol: :lol:

Melody33
12-23-2007, 12:31 AM
b]monomono[/b],

بالنسبة لى فيلم مأساوى وأداء صالح سليم كان واقف قوى (منشى) :razz: ... بس خليها فى سرك علشان باربى ماتزعلش :)

شوفى التوبيك ده تجدى مايسرك :???:
http://www.el-ahly.net/phpBB2/viewtopic.php?t=28183&start=0

malek el masry
12-23-2007, 12:36 AM
malek el masry,


الصراحة ما اقدرش اثق في نظرتك من بعد حكاية الشموع السوداء



دى نظرتى فى الافلام انما الممثلين حاجة تانية :lol:

جربنى بس المرة دى 8-)اية يا باربى انتى ما بتحبيش الفيلم دة ولا اية :razz: :razz:

انتي فاهمة الموقف بالعكس
:)

باربي هي اللي بتحب الشموع السوداء و انا اللي مابطيقوش

malek el masry
12-23-2007, 12:38 AM
malek el masry,


الصراحة ما اقدرش اثق في نظرتك من بعد حكاية الشموع السوداء



دى نظرتى فى الافلام انما الممثلين حاجة تانية :lol:

جربنى بس المرة دى 8-)

برضه مش مطمنلك
:)

مش صالح سليم كان عاجبك كممثل برضه؟
:lol:

The lion king
12-23-2007, 12:40 AM
أنا كنت لسه هأرد بنفس الرد تقريبا ... أحسن فيلم لكريم عبد العزيز فيلم المشبوه!

_________________

:mad: :mad: :mad:

:-x :-x :-x

كريم عبد العزيز بيمثل بوسامته مش اكتر

لكن تعبير واداء مفيش

سبب انتشاره المثلث

احمد جلال اخراج

بلال فضل قصه وسيناريو وحوار

وهو كبطل

لكن مثلا فتحي عبد الوهاب او احمد عزمي افضل منه

لا بالعكس هو بيمثل كويس..ومش بوسامته

اللى بيمثل بوسامته..ده لو اتفقنا ان هو وسيم

احمد عز..على راى واحد عامل زى الفته البايشه زى ما بيقولوا :)

monomono
12-23-2007, 12:40 AM
Melody33
مرسى على التوبيك دة انا فتحتة وبصيت فية بس انا هقراة بكرة على رواقة لما ارجع من الشغل
بس كلك زوق صراحة

Melody33
12-23-2007, 12:59 AM
monomono,

العفو الشكر كله لباربى :???:

barby
12-23-2007, 05:44 AM
malek el masry,


الصراحة ما اقدرش اثق في نظرتك من بعد حكاية الشموع السوداء



دى نظرتى فى الافلام انما الممثلين حاجة تانية :lol:

جربنى بس المرة دى 8-)اية يا باربى انتى ما بتحبيش الفيلم دة ولا اية :razz: :razz:

يا بنتى ده انا طلعت من البلد عشان قلت انى بحبه :lol:

barby
12-23-2007, 05:50 AM
malek el masry,


الصراحة ما اقدرش اثق في نظرتك من بعد حكاية الشموع السوداء



دى نظرتى فى الافلام انما الممثلين حاجة تانية :lol:

جربنى بس المرة دى 8-)

برضه مش مطمنلك
:)

مش صالح سليم كان عاجبك كممثل برضه؟
:lol:

شوف صالح سليم عاجبنى كله على بعضه
فمعرفتش افرق يعنى اى حاجة منه حلوة
فهمت النظرية :twisted:

El_Ahlawy
12-23-2007, 11:02 AM
malek el masry,

عم مالك

الأفلام بتكون حسب الجو العام للإنسان و عامة البشر
في الخمسينات و الأربعينات كانت الناس رايقة و التعداد السكاني قليل و كانت التكنولوجيا قليلة
يبقى التركيز أكيد يكون على أكثر من حاجة

أداء الممثل لأن الكاميرات ما كانتش بالتقنية الحالية

القصة اللي تشد الناس بتوع وقتيها ، يعني لو عملت فيلم الأرض دلوقتي حيقشل مع مرتبة الشرف و حتتفرج عليه انت و فاروق حسني بس :lol:

عمق الشخصيات و تطوير الكاتب ليها في القصة و ده لأن الناس ساعتها كانت بترجع بيتها الساعة 2 الضهر من شغلها مش زينا بنرجع الساعة 6 و 7 يعني و مخنا يكون متجزر من الرأسمالية الحديثة، يعني لو جابولنا أي فيلم من بتوع محمود مرسي أو عبد الوارث عسر أو يحيى شاهين ممكن نقفل التليفزيون بعد خمس دقايق لأن الضغط على الإنسان مخيف دلوقتي و الأفلام مش أكثر من حالة هروب من الواقع

يبقى انت بتظلم المخرجين و الممثلين انك بتقارنهم بناس لو مثلوا دلوقتي حيفشلوا أكيد و ما حدش حيتفرج على أفلامهم

الأكشين بقى إضافة للمخرج مش للمثل ، يعني المخرج عايز يوري مواهبه يوريها إزاي ؟
لو الممثل عمل مشهد حلو حيقولوا ده ممثل رائع و ينسوا المخرج
يعني عمارة يعقوبيان التمثيل كان رائع من الجميع بدون إستثناء و أنا ما فكرتش أعرف المخرج مين
عكس ما يكون فيلم زي الجزيرة أول حاجة حتسأل عنها مين المخرج ده ؟

أنا في رأيي الأفلام المصرية هي في عصرها الذهبي مقارنة بالثمانينات و التسعينات و السبعينات كمان لأن المخرجين و الممثلين بيعملوا حاجة محترمة سواء بنظام هوليودي أو لأ

مثال: التفاصيل الصغيرة مهمة أوي لمل واحد ينقتل زمان كان الميكروكروم بيبقى شكله نيلة
و صوت العربية البيجو و هي بتأمرك في مطاردة للعربيات كانت الناس بتتريأ عليه
و الحساسية الزائدة لمحمود ياسين و يحيى شاهين بتجيب وجع دماغ لأنها مبالغ فيها جدآ

فيلم ملاكي إسكندرية ممتاز و الحبكة ممتازة
فيلم واحد من الناس ممتاز
فيلم مافيا برضه كويس أوي لأنه كان الأول اللي ينزل بالمستوى ده
أفلام أحمد حلمي من مطب صناعي لظرف طارق لزكي شان كلها أفلام كوميدي يناسب الوقت ده بإمتياز

شاوشانك ردمبشين مثلآ من الأفلام المميزة لكنه لا يمت عن الواقعية بأي صلة زيه زي فورست جامب
يعني في السجون الأمريكية مش حتلاقي العلاقات الإنسانية دي حتلاقي النازيين الجدد و السود و الهيسبانيكس و طجن في بعضه
و فورست جامب واحد معتوه بيبقى مليونير و بيقابل كل الزعماء و ما بيموتش في الحرب كمان واسعة

إذن الفكرة اننا نشوف الهدف من الفيلم إيه ؟ و لو الممثلين أدوا الفكرة و الهدف بشكل كويس

أنا عن نفسي متحيز أوي حاليآ للسينما المصرية و شايف ان أمريكا انتهت كليآ و بقالي سنين ما شفتش لا فيلم فيه فكرة و لا تمثيل ولا أي حاجة عندهم و أتفق معاك ان هوليوود بوظت الأفلام عشان كده الأفلام البريطاني و الأسباني بقت ممتعة أكثر كثير

و يجعله سينما

ladyde
12-23-2007, 11:59 AM
El_Ahlawy, كل ده كاتمه في قلبك و ساكت يا رائد :mad: :mad: :mad:


بس بجد بقى تحليل سليم مليون في المائة لأن للأسف إحنا دايما بنقارن بالقديم من غير مانحط في بالنا المتغيرات الموجودة في المجتمع سواء ماديا أو إجتماعيا أو حتى نفسيا

ahlawi_qadeem
12-23-2007, 12:39 PM
قرأت بعض البوستات، واستمتعت بجزء منها.. وربما أفتقد النظرة النقدية، والتى يتمتع البعض هنا بها -كما يبدو- فى مثل هذه الأمور

ولكن أهتميت خاصة بما قاله

malek elmasry:

يعني هيه فوضي ده عبارة عن مقال سياسي ضحل لمخرج تافه اسمه خالد يوسف بيعتنق المذهب الناصري

وسر اهتمامى بها هو فقط عدم فهمى للعلاقة بين مستوى خالد يوسف الإخراجى وإعتناقه المذهب الناصرى

يبدو أن هناك ثمة علاقة ما بين هذا وذاك.. ولكن بصراحة لا أدرى ماهيتها

ladyde
12-23-2007, 12:46 PM
وسر اهتمامى بها هو فقط عدم فهمى للعلاقة بين مستوى خالد يوسف الإخراجى وإعتناقه المذهب الناصرى

يبدو أن هناك ثمة علاقة ما بين هذا وذاك.. ولكن بصراحة لا أدرى ماهيتها

إعتراض مالك على إن خالد يوسف دائم الإقحام لإتجاهه السياسي في أفلامه و إن كنت لا أرى في هذا عيب

كم من مخرجين عظام أفلامهم عبارة لدعاية عن توجهاتهم السياسية

خالد يوسف من وجهة نظري هو المخرج الوحيد في الجيل الحالي اللي صاحب رؤية سياسية سواء إتفقنا أو إختلفنا معاها و ده بيناقض إتهامه بالضحالة و إلا واحد زي أبو لبن ده يبقى إيه بقى

El_Ahlawy
12-23-2007, 01:01 PM
El_Ahlawy, كل ده كاتمه في قلبك و ساكت يا رائد :mad: :mad: :mad:


بس بجد بقى تحليل سليم مليون في المائة لأن للأسف إحنا دايما بنقارن بالقديم من غير مانحط في بالنا المتغيرات الموجودة في المجتمع سواء ماديا أو إجتماعيا أو حتى نفسيا

ده أقل حاجة عندي معلش ماسك نفسي عشان مشاعر الأخوة الزملاء
:lol: :lol:

طبعآ الحاجات المادية كمان لازم تدخل في الحسبة، زمان الشقق كانت متلتلة و الشوارع فاضية و المواصلات سهلة و الهواء نضيف
تخيلي واحد مش لاقي شقة ولا شغل كويس داخل فيلم بيشوف واحد عمال يعيط على أبنه زي فريد شوقي في لا تبكي يا حبيب العمر
المتفرج عنده حالة صدمة من الواقع المهبب الموجود

و العشوائيات و التخلف جزء من حياتنا اللي الناس اللي فوق ظبطوا حياتهم و المساحة اللي عايشين فيها و سكة الشغل و عملوها جنة و الباقي يولع بجاز

و المثقفين زي حالتنا أقصى ما عندهم بوست في المنتدى أو كلمة على موقع أو شتيمة في النظام بدون أي قابلية للتغيير
و الدليل الصغير إن كلمة أحمد السقا " من النهاردة مافيش حكومة أني الحكومة.." قلبت الدنيا و الناس ماسكاها لوحدها في الفيلم

جايز الأفلام دي تقدم للناس اللي المثقفين زينا فشلوا فيه و يدوهم قدرة على مقاومة الواقع و تغييره و الثورة عليه و شرف التجربة يكفيك

و يجعله واقعية

ladyde
12-23-2007, 02:00 PM
ده أقل حاجة عندي معلش ماسك نفسي عشان مشاعر الأخوة الزملاء


ربنا يخليك للأخوة الزملاء :lol: :lol: :lol:




طبعآ الحاجات المادية كمان لازم تدخل في الحسبة، زمان الشقق كانت متلتلة و الشوارع فاضية و المواصلات سهلة و الهواء نضيف
تخيلي واحد مش لاقي شقة ولا شغل كويس داخل فيلم بيشوف واحد عمال يعيط على أبنه زي فريد شوقي في لا تبكي يا حبيب العمر
المتفرج عنده حالة صدمة من الواقع المهبب الموجود

أو فيلم زي سيدة القصر اللي كان بيضرب بيه االمثل في الفقر علشان الأوضة اللي هي على السطوح

اللي النهاردة عيلة من 10 أفراد ساكنين فيها و مش قادرين على تمنها كمان

لا و عفشة المية مشتركة :roll: :roll:

كمال حسن
12-23-2007, 02:04 PM
:twisted:

ladyde
12-23-2007, 02:16 PM
كمال حسن, كلامك حلو جدا بس صغيييييييير جدا جدا جدا :mad: :mad: :mad:

طبعا الكلام مضبوط و الناس فاض بيها

اللي ساكن في حارة أو صنايعي لما بيدخل الفيلم ده ممكن يكون بيشوف شرايح قريبة منه و بيشوفها كل يوم بل و قد يكون عايشها هي نفسها كل يوم

جايز إحنا علشان مش عايشين الواقع ده و مش بنشوفه فبنحس أنه هي دي بقت مصر فعلا لكن الواقع بيقول إن دول مازالوا شريحة فقط

ليست الأغلبية

كمال حسن
12-23-2007, 02:54 PM
الواقع بيقول إن دول مازالوا شريحة فقط

ليست الأغلبية

ladyde,
ازاي ؟
2 مليون
طفل شوارع
50 %
من الشعب المصري تحت خط الفقر ...ازاي تبقي (شريحه )بسيطة وليست أغلبيه
المجتمع المصري مقبل علي كارثه

اقول لحضرتك علي حاجه
كنت مع صديق مهتم بقصه أطفال الشوارع وقالي تصدق اني لاحظت حاجه غريبه
قال : في اطفال الشوارع القاده بتوعهم كل شوية بيتغيروا في كل منطقه لها كبير بيدبحوا في بعض حتي يبقي الأقوي والأشرس هو الكبير زي عائلات المافيا (وعلي فكرة بيسمعوا ويطيعوا للكبير بتاعهم بدون تفكير ) ..قالي انت عارف لو واحد من دول فكر انه يعمل زي جنكيز خان ويسيطر علي كل المناطق ويكون الكبير بتاع الكل

ممكن يحكم مصر تاني يوم

انا مش عارف قدرت أوصل لحضرتك خطورة يعني ايه جيش من 2 مليون ؟

ladyde
12-23-2007, 03:00 PM
كمال حسن, أنا مش قصدي أنهم قليلين بس 2 مليون في وسط 82 مليون شريحة برضه

أه العدد يخض و يصدم

أه دول عبارة عن 2 ملون مأساة و كارثة و مصيبة تمشي على رجلين

بس قصدي إن حتي أغلبية الشعب اللي تحت خط الفقر كام فالمية منهم عايشين زي القطط و الكلاب كده

ده كان قصدي بكونهم شريحة من شريحة كمان و اللي هي فقراء مصر

pecaso
12-23-2007, 03:12 PM
El_Ahlawy,

اختلف معاك يا رائد ان امريكا انتهت كليا لان امريكا بتعتمد اكتر علي كتاب السيناريو والمخرجين وامريكا لسه ولاده من الكتاب الكبار

يكفي وجود مارتن سكورسيزي وسيبيليبرج واوليفر ستون وريدلي سكوت وجورج لوكاس كمخرجين متميزين جداا

يمكن الانتاج المتميز قل لصالح افلام تجاريه معينه لكن المواضيع المتميزة الدراميه سواء في اطار رومانسي او اكشن لسه موجوده

واتفق معاك في وجود سينما راقيه في بريطانيا والمانيا وفرنسا طبعاا وده من زمان

وبخصوص السينما المصريه بعتبر احنا في مرحلة انتقاليه المخرجين الحالييين معتمدين اكتر علي سينما الكليبات وباستخدام ادوات الفيديو كليب والدليل ان مخرجين كتار كانوا مخرجين كليبات ودلوقتي بقوا مخرجين سينما

هاتلي مخرج مصري مبدع ممكن اقول خالد الحجر او احمد جلال و ساندرا نشأت وعلفكرة ساندرا بدات كمخرجة كليبات بس مخرجه بحترمها جدا من اول افلامها مبروك وبلبل شريف عرفه ده اخر جيل المتميزين وبيحاول يصنع شيء من الخامه الموجوده حاليا

لكن غير كده مفيش مخرج محترم كلهم تافهين ومن عينة افلام عليا الطرب وشيكامارا وكركر

احنا السينما عندنا بتدهور وفيه دول تانيه بتطور زي السينما الايرانية والتونسيه والمغربيه

كمال حسن
12-23-2007, 03:14 PM
ladyde,
انا كلامي عن المستقبل القريب وليس الأن
انا اتكلم عن كارثه قادمه
السؤال لحضرتك الشرائح اللي حضرتك بتقصديها وتحدثت انا عنها
بتتزايد ولا تتناقص؟
اطفال الشوارع ..الكيان دا بيكبر ولا بيختفي؟
شريحه الفقراء في مصر بتزيد ولا تختفي ؟

منتظر ردك

pecaso
12-23-2007, 03:26 PM
كمال حسن,

انا كنت عملت توبيك عن اطفال الشوارع وجيبت تقرير من البي بي سي

لكن المشكله مش في اطفال الشوارع المشكله الاكبر

في غياب العدالة الاجتماعيه وانتشار الظلم والفساد

وانتشار شريحة الفقر في مختلف مناطق مصر من شمالها وجنوبها

وشريحة اطفال الشوارع هي نتاج شريحة الفقر ال في زيادة نتيجة الاسباب ال قولتلك عليها

وكل ده بيؤدي لنتائج اسوأ زي التطرف و الجريمه والادمان

لكن كلامك عن تحرك اتنين مليون طفل مشرد وخطرهم علي المجتمع هما مش هيتحركوا لان ال اولي بالتحرك ال 40 مليون الفقير

ال مابين بطالة او مرتبات زهيدة او غياب تامين صحي

ال 40 مليون فقير مع ال 2 مليون طفل مشرد اتزرع فيهم جينات السكوت والصبر الممل وده من زماااااااااااااااااااااااااااان

كله همه لقمة العيش والجنيه لكن انه يفكر في حقه او ايه ال وصله لكده ده صعب شويه

ladyde
12-23-2007, 03:35 PM
انا كلامي عن المستقبل القريب وليس الأن
انا اتكلم عن كارثه قادمه
السؤال لحضرتك الشرائح اللي حضرتك بتقصديها وتحدثت انا عنها
بتتزايد ولا تتناقص؟
اطفال الشوارع ..الكيان دا بيكبر ولا بيختفي؟
شريحه الفقراء في مصر بتزيد ولا تختفي ؟

منتظر ردك

طبعا و قطعا كلامك صح و لا إختلاف بيننا أكثر من إني بس مصرة إن النوعية دي مش الغالبية العظمى من الفقراء

هما جزء و وجوده أصلا مصيبة بس مازالوا الجزء الأقل

مازال فاضل من في فقرهم شرفهم أغلى من حياتهم نفسها

مازال من فقرهم لم يدفعهم للبلطجة و بيدعوا الباسط يعدلها

أه الناس اللي زي دول بيتناقصوا بس المشكلو مش فيهم قد ما هي في غياب تام لأي عدالة إجتماعية

خد عندك أنا مثلا
يخصم من مرتبي حوالي 500 جنيه ضرائب فقط

طب ده و أنا محسوبة على الفئة الوسطى في المرتبات

الفلوس دي بتروح فين و في جيب مين

كمال حسن
12-23-2007, 03:53 PM
ladyde, pecaso,
انا أؤكد لكم ان أطفال الشوارع وتعاملت مع بعضهم بنفسي
في منتهي الشراسه
والله الغالبيه العظمي منهم قلبهم ميت تماما
وعندما اقول ان قلبهم ميت فانا أعي تماما ما أقوله ....أطفال الشوارع ليس في قلبهم ذرة رحمه ....كان كلام بعضهم انهم مستعدين يقتلوا امام مسجد مقابل نص جنيه يتعشوا بيه ...انتم متخيلين بيفكروا ازاي
قالوا ان احنا محدش رحمنا ولا حد هيرحمنا فاحنا عمرنا ماهنرحم حد
دا كلامهم حرفيا
علي فكره دي قضيه خطيييييييرة جدا ومن احتك بهم يعي تماما ما أقول

المجتمع المصري يتجه الي منحدر خطير
وعلي فكره أطفال الشوارع مش في مصر بل في السعودية والأردن بدرجه كبيره جدا كمان
واما ان الأولي ان الفقير يتحرك فانا اختلف معك
لا يتحرك الا صاحب القلب الميت ...الذي لن يخسر شئ ولن يبكي علي شئ
فأسهل ناس تثيرها اطفال الشوارع لأنهم يعلمون جيدا ان المجتمع لم يرحمهم
:-( :o

كمال حسن
12-23-2007, 03:59 PM
:twisted:

pecaso
12-23-2007, 04:07 PM
انا متفق معاك لانك اكيد احتكيت بيهم اكتر مني

انا لما بقصد ان الاولي الفقير ال يتحرك انا بقصد ان الطبقه الفقيرة الاعلي هي ال ولدت شريحة اطفال الشوارع وكان المفروض هي تتحرك من زمان

فيلم تيتو كان بيعالج الفساد في جهاز الشرطه والقي الضوء عليه بصورة اكبر من ازمة اطفال الشوارع

بيقنع الاعلام ان طفل الشارع هو طفل الاصلاحية وبيشرب سجاير او بانجو وبس

لكن الامر اخطر بكتير من كده

malek el masry
12-23-2007, 04:26 PM
الأفلام بتكون حسب الجو العام للإنسان و عامة البشر
في الخمسينات و الأربعينات كانت الناس رايقة و التعداد السكاني قليل و كانت التكنولوجيا قليلة
يبقى التركيز أكيد يكون على أكثر من حاجة

مين دي اللي كانت رايقة في الاربعينات و الخمسينات يا عم رائد؟

انت حتعوم علي عوم مسلسل زيزينيا و مسلسل الملك فاروق و فيلم عمارة يعقوبيان ولا ايه؟
:)
اقتصاديا واجتماعيا مصر ساعتها كانت اسوا بكتير من دلوقت

رغم اني من اشد المعارضين لدولة ثورة يوليو السلطوية التي دمرت السياسة و الاقتصاد في مصر الا اني لا يمكن ان اوافق علي موضة الحنين و النوستالجيا للعصر الملكي

مصر اياميها كانت حلوة بالنسبة لكام الف من الباشوات و الافندية اللي كانوا عايشين في بعض مناطق القاهرة و الاسكندرية انما بقية الشعب المصري كانوا بياكلوا تبن و عايشين زي البهايم
و شكرا علي كده

الفقر و الجوع و المرض و الجهل كان السمة المميزة ل95% من الشعب المصري

لو عايز تقول ان البلد كانت اروق بالنسبة لسكان الزمالك و مصر الجديدة ماشي صح بس دول علي بعضيهم كده مايقفلوش 100 الف يعني مش جمهور حقيقي لاي سينما


أداء الممثل لأن الكاميرات ما كانتش بالتقنية الحالية

النظرية بتاعتك مش صح قوي لان مثلا تكنولوجيا التصوير السينمائي
في الستينات سواء في اوروبا او امريكا او حتي مصر تقدمت كثير جدا عن
الاربعينات لكن مستوي التمثيل ارتفع ايضا و بشدة و لم ينخفض عكس ما نظريتك بتقول

فيلم زي زوجتي و الكلب لسعيد مرزوق فيه احلي شغل تصوير و كاميرات سينمائية شفته في السينما المصرية من المبدع مدير التصوير الاسطورة عبدالعزيز فهمي و برغم كده كان فيه مباراة في الاداء التمثيلي بين محمود مرسي و سعاد حسني و نور الشريف

فيلم
the conformist
بتاع برتولوتشي كان ثورة في مجال الصورة السينمائية و ايضا شهد اداء تمثيلي مذهل من جان لوي ترنتنيان
و دومينيك ساندا

افلام المخرجين الاساطير انجمار برجمان و فيديريكو فيلليني و انطونيوني كانت فتح في عالم الصورة السينمائية في الستينات و السبعينات و برغم ذلك شهدت كلها اداء تمثيلي كاقوي مايكون


القصة اللي تشد الناس بتوع وقتيها ، يعني لو عملت فيلم الأرض دلوقتي حيقشل مع مرتبة الشرف و حتتفرج عليه انت و فاروق حسني بس

و مين قالك ان فيلم الارض كان ناجح اياميها؟ برضه كان فيلم للمثقفين فقط وفيلم الحرام اللي اغلب المثقفين شايفينه فيلم عبقري كانت صالات العرض بتنش و فاضية و هو بيتعرض

اغلب الجمهور كان غاوي افلام فريد شوقي و رشدي اباظة و الهشك بشك.

الجمهور و اذواقه الاستهلاكية و ماذا يريد من السينما لم يتغير كثيرا كبنية عامة من زمان لدلوقت.

الاساس هو سينما الترفيه و التسلية و دغدغة الاحلام علي الطريقة الهوليودية. كان هذاهو الاساس زمان ولايزال هو الاساس دلوقت

انا مابتكلمش عن الطلب لان المشكلة مش فيه. المشكلة في العرض

طول عمر الجمهور غاوي افلام التسالي بالاساس لكن زمان العرض و الانتاج كان فيه تنوع و تعددية اكبر: يعني زي ما كانت فيه افلام الهيافة و التسالي كانت فيه افلام قوية بتقدم لغة سينمائية مختلفة و فكر جاد. كان فيه ده و فيه ده

دلوقت الانتاج كله استامبا واحدة و الاجيال الجديدة بالذات من صناع السينما ماعندهمش اي هم اجتماعي او رؤية اجتماعية

و اللي فيهم تقنيا كويس زي طارق العريان مثلا حتلاقيه خاضع تماما لمذهب الفن للفن. انا بقعد مع مخرجين شبان و فيهم موهوبين كتير لكن كلهم متبنيين مذهب الفن للفن و المفارقة انهم في الاخر يعني مابيقدموش فن للفن جميل

يعني لو عايزين امثلة لافلام الفن للفن الحلوة فهناك مثلا افلام زوجتي و الكلب لسعيد مرزوق و المومياء لشادي عبد السلام و الاثنين في السبعينات و المستحيل لحسين كمال


عمق الشخصيات و تطوير الكاتب ليها في القصة و ده لأن الناس ساعتها كانت بترجع بيتها الساعة 2 الضهر من شغلها مش زينا بنرجع الساعة 6 و 7 يعني و مخنا يكون متجزر من الرأسمالية الحديثة،
ارجع و اقولك نظريتك تسقط تماما لو بصيت علي تاريخ السينما في اوروبا و امريكا

ثورة الانتاج الراسمالي الصناعي و النقلة الحقيقية الكبيرة حدثت بعد الحرب العالمية الثانية و بالتالي شكل و نمط الحياة تغير تماما و برغم هذا مستوي السينما كفكر و ادوات و تقنيات و مضمون و حرفية تطور و تقدم كثيرا و صار اكثر تعقيدا بمراحل
مع تعقد نمط الحياة الراسمالية السينما ازدادت تعقيدا و ليس العكس


يعني لو جابولنا أي فيلم من بتوع محمود مرسي أو عبد الوارث عسر أو يحيى شاهين ممكن نقفل التليفزيون بعد خمس دقايق لأن الضغط على الإنسان مخيف دلوقتي و الأفلام مش أكثر من حالة هروب من الواقع
يبقى انت بتظلم المخرجين و الممثلين انك بتقارنهم بناس لو مثلوا دلوقتي حيفشلوا أكيد و ما حدش حيتفرج على أفلامهم



العكس هو الصحيح

افلام الاربعينات بتاعت بنت الباشا و ابن الجنايني و انور وجدي و ليلي مراد هي اللي كانت هروب من الواقع للاحلام و نفس الحكاية كانت في هولييود برضه

انما افلام محمد خان و عاطف الطيب و خيري بشارة و داود عبد السيد في الثمانينات هي انغماس في الواقع

يبقي مافيش اي ظلم لمخرجين اليومين دول لما اقارنهم بمحمد خان مثلا لانه نفس العصر بل و كمان ظروفهم الاقتصادية افضل يبقي المفروض يبقوا احسن منه مش يتقهقروا للخلف


الأكشين بقى إضافة للمخرج مش للمثل ، يعني المخرج عايز يوري مواهبه يوريها إزاي ؟
لو الممثل عمل مشهد حلو حيقولوا ده ممثل رائع و ينسوا المخرج

ايه يا عم الكلام ده؟
:lol: :lol:

شغل المخرج بيبان في حاجتين: الصورة و اعني جماليات الصورة و الكادرات و حركة الكاميرا + الدراما و اعني الرؤية الدرامية للفيلم و القائمة علي السيناريو و توجيه الممثلين و دراميات الصورة ايضا

و لا كان اي مخرج عظيم لازم يعمل اكشن عشان يقول انا هه


يعني عمارة يعقوبيان التمثيل كان رائع من الجميع بدون إستثناء و أنا ما فكرتش أعرف المخرج مين
ده فيلم تعبان اصلا و لا يصح الاستشهاد به في رايي


عكس ما يكون فيلم زي الجزيرة أول حاجة حتسأل عنها مين المخرج ده ؟

ماشي و بعد مشاهدة افلام مهمة مستحيلةبتاعت توم كروز او افلام الاكشن بتاعت المخرج جون ووه الناس بتبقي منبهرة بالحرفية بتاعت الفيلم لكن ده لا يعني اكثر من انهم مخرجين متمكنين حرفيا من افلام الاكشن

لكنهم مش مخرجين عظام لان اغلب افلام الاكشن دي افلام عبيطة اصلا


أنا في رأيي الأفلام المصرية هي في عصرها الذهبي مقارنة بالثمانينات و التسعينات و السبعينات كمان لأن المخرجين و الممثلين بيعملوا حاجة محترمة سواء بنظام هوليودي أو لأ

التقدم الوحيد اللي حاصل دلوقت هو في التقنيات: يعني الصوت بقي كويس و الاستديوهات اتصلحت و تقنيات الصورة بقت اعلي
الثمانينات هو العصر الذهبي للسينما المصرية: افلام الثمانينات كانت رائعة و كانت قادرة علي اكتساح جوائز المهرجانات العالمية لكن مشكلتها ان التحميض و الطبع كان بيحصل في استديوهات متهالكة انتهي عمرها الافتراضي فبتلاقي الصوت بايظ و شريط الصورة فيه خروشة و غيرها من العيوب التقنية و ده اللي كان بيقتل فرصتها في المهرجانات العالمية
انما كدراما و فكر و سيناريو و رؤية اخراجية و اداء ممثلين كانت عشرة علي عشرة


فيلم ملاكي إسكندرية ممتاز و الحبكة ممتازة

تقنيا كويس لكنه فيلم تافه في النهاية

فيلم مافيا برضه كويس أوي لأنه كان الأول اللي ينزل بالمستوى ده

برضه تقنيا كويس لكنه فيلم حقير بكل ماتعنيه الكلمة و انا عرضت نقد تفصيلي له في توبيك سينما نعم سينما لا

أفلام أحمد حلمي

من مطب صناعي لظرف طارق لزكي شان كلها أفلام كوميدي يناسب الوقت ده بإمتياز

دي افلام مسلية لتمضية وقت ظريف لكن السينما الحقيقية حاجة تانية


شاوشانك ردمبشين مثلآ من الأفلام المميزة لكنه لا يمت عن الواقعية بأي صلة زيه زي فورست جامب
يعني في السجون الأمريكية مش حتلاقي العلاقات الإنسانية دي حتلاقي النازيين الجدد و السود و الهيسبانيكس و طجن في بعضه
و فورست جامب واحد معتوه بيبقى مليونير و بيقابل كل الزعماء و ما بيموتش في الحرب كمان واسعة

و مين قالك اني معجب بالفيلمين دول؟


إذن الفكرة اننا نشوف الهدف من الفيلم إيه ؟ و لو الممثلين أدوا الفكرة و الهدف بشكل كويس

التقييم بيبقي علي الهدف اساسا

هل لو الفيلم قاصد من البداية انه يقدم شئ هايف لكنه اجاد في الوصول الي هدفه يعتبر كده فيلم كويس؟ لا طبعا. الهايف يظل هايف


أنا عن نفسي متحيز أوي حاليآ للسينما المصرية و شايف ان أمريكا انتهت كليآ

يا راجل اتق الله
:)
هو دلوقت فيه سينما في مصر اصلا؟ علي العموم انا اتكلمت بالتفصيل عن ده في توبيك سينما نعم سينما لا

و بقالي سنين ما شفتش لا فيلم فيه فكرة و لا تمثيل ولا أي حاجة عندهم و أتفق معاك ان هوليوود بوظت الأفلام عشان كده الأفلام البريطاني و الأسباني بقت ممتعة أكثر كثير

طول عمر السينما الاوروبية اعمق و اقوي من الخمسينات و جتي الان و
بالتحديد الافلام الفرنسية و الايطالية و البريطانية و الاسبانية
بمخرجين عباقرة زي فيلليني و انطونيوني و الان رينيه و جان لوك جودار و برتولوتشي و فرانسوا تروفو و كلود شابرول و بدرو المودوفار و لويس بونويل و فيسكونتي و فيتوريو دي سيكا و اليخاندرو امينابار و غيرهم

الي جانب سينما السويدي انجمار برجمان و البولندي كيشلوفسكي
و الروسي تاركوفسكي و الياباني اكيروساوا و النمساوي مايكل هانيكا و الالماني
فيم فيندرز

السينما الامريكية قدمت الكثير من الروائع و ماتزال خصبة و متجددة لكن عن اي سينما امريكية نتحدث؟ انا لا اعني توم كروز و ميل جيبسون و جورج كلوني و ستيفن سبيلبيرج

السينما الامريكية عندي هي افلام المخرجين هيتشكوك و مارتن سكورسيزي و فرانسيس فورد كوبولا و ديفيد لينش و روبرت التمان و سيدني بولاك و سبايك لي و سيدني لوميت و هؤلاء المخرجين العظام كلهم خرجوا و تمردوا ضد التقاليد الهوليوودية الراسخة ده بالاضافة الي افلام النيو جييك و الافلام الاندبندنت

انما افلام زي تيتانيك و الحاجات دي فمكانها في صفيحة الزبالة

ladyde
12-23-2007, 04:43 PM
malek el masry, يخرب بيت اللي يزعلك يا شيخ




كل ده رد يا جدع :lol: :lol: :lol:

malek el masry
12-23-2007, 04:46 PM
El_Ahlawy,

اختلف معاك يا رائد ان امريكا انتهت كليا لان امريكا بتعتمد اكتر علي كتاب السيناريو والمخرجين وامريكا لسه ولاده من الكتاب الكبار

يكفي وجود مارتن سكورسيزي وسيبيليبرج واوليفر ستون وريدلي سكوت وجورج لوكاس كمخرجين متميزين جداا

يمكن الانتاج المتميز قل لصالح افلام تجاريه معينه لكن المواضيع المتميزة الدراميه سواء في اطار رومانسي او اكشن لسه موجوده

واتفق معاك في وجود سينما راقيه في بريطانيا والمانيا وفرنسا طبعاا وده من زمان

وبخصوص السينما المصريه بعتبر احنا في مرحلة انتقاليه المخرجين الحالييين معتمدين اكتر علي سينما الكليبات وباستخدام ادوات الفيديو كليب والدليل ان مخرجين كتار كانوا مخرجين كليبات ودلوقتي بقوا مخرجين سينما

هاتلي مخرج مصري مبدع ممكن اقول خالد الحجر او احمد جلال و ساندرا نشأت وعلفكرة ساندرا بدات كمخرجة كليبات بس مخرجه بحترمها جدا من اول افلامها مبروك وبلبل شريف عرفه ده اخر جيل المتميزين وبيحاول يصنع شيء من الخامه الموجوده حاليا

لكن غير كده مفيش مخرج محترم كلهم تافهين ومن عينة افلام عليا الطرب وشيكامارا وكركر

احنا السينما عندنا بتدهور وفيه دول تانيه بتطور زي السينما الايرانية والتونسيه والمغربيه

انا معاك في اطروحتك الاساسية لكن عندي اعتراض علي بعض الاسماء


مافيش في دول حد جامد غير سكورسيزي و الي حد اقل جدا اوليفر ستون

و الباقيين سينما تجارية

سبيلبيرج ماعملش اي فيلم قوي غير قائمة شندلر و الي حد اقل ميونيخ و الباقي اي كلام

ريدلي سكوت بتاع الجلادياتور ده هولييودي و تجاري قح

جورج لوكاس ده مش مخرج اصلا. ده مهندس كمبيوتر

اعظم مخرجي امريكا من الاحياء هم مارتن سكورسيزي و فرانسيس فورد كوبولا و روبرت التمان

السينما الايرانية اوفر ريتيد في رايي
مافيش سينما حقيقية في تونس او المغرب

كمال حسن
12-23-2007, 04:50 PM
:twisted:

pecaso
12-23-2007, 04:59 PM
El_Ahlawy,

اختلف معاك يا رائد ان امريكا انتهت كليا لان امريكا بتعتمد اكتر علي كتاب السيناريو والمخرجين وامريكا لسه ولاده من الكتاب الكبار

يكفي وجود مارتن سكورسيزي وسيبيليبرج واوليفر ستون وريدلي سكوت وجورج لوكاس كمخرجين متميزين جداا

يمكن الانتاج المتميز قل لصالح افلام تجاريه معينه لكن المواضيع المتميزة الدراميه سواء في اطار رومانسي او اكشن لسه موجوده

واتفق معاك في وجود سينما راقيه في بريطانيا والمانيا وفرنسا طبعاا وده من زمان

وبخصوص السينما المصريه بعتبر احنا في مرحلة انتقاليه المخرجين الحالييين معتمدين اكتر علي سينما الكليبات وباستخدام ادوات الفيديو كليب والدليل ان مخرجين كتار كانوا مخرجين كليبات ودلوقتي بقوا مخرجين سينما

هاتلي مخرج مصري مبدع ممكن اقول خالد الحجر او احمد جلال و ساندرا نشأت وعلفكرة ساندرا بدات كمخرجة كليبات بس مخرجه بحترمها جدا من اول افلامها مبروك وبلبل شريف عرفه ده اخر جيل المتميزين وبيحاول يصنع شيء من الخامه الموجوده حاليا

لكن غير كده مفيش مخرج محترم كلهم تافهين ومن عينة افلام عليا الطرب وشيكامارا وكركر

احنا السينما عندنا بتدهور وفيه دول تانيه بتطور زي السينما الايرانية والتونسيه والمغربيه

انا معاك في اطروحتك الاساسية لكن عندي اعتراض علي بعض الاسماء


مافيش في دول حد جامد غير سكورسيزي و الي حد اقل جدا اوليفر ستون

و الباقيين سينما تجارية

سبيلبيرج ماعملش اي فيلم قوي غير قائمة شندلر و الي حد اقل ميونيخ و الباقي اي كلام

ريدلي سكوت بتاع الجلادياتور ده هولييودي و تجاري قح

جورج لوكاس ده مش مخرج اصلا. ده مهندس كمبيوتر

اعظم مخرجي امريكا من الاحياء هم مارتن سكورسيزي و فرانسيس فورد كوبولا و روبرت التمان

السينما الايرانية اوفر ريتيد في رايي
مافيش سينما حقيقية في تونس او المغرب

فيه مخرجين تانين بس انا مش متذكرهم وسيبيلبرج له افلام متميزة

زي بيتر بان وميونيخ والذكاء الاصطناعي وصالة الوصول وكاتش مي اف يو كان وكاست اواي ومانقدرش نغفل ده

معاك طبعا ان مفيش حد هيتكرر زي فرانسيس فورد كابولا او هيتشكوك والتمان

لكن فيه مخرجين ابتدوا يقدموا حاجه كويسه زي بيتر جاكسون وجون ايميل وسيدليبرج

اما بخصوص السينما الايرانيه والمغربيه فهي بتطور ولهم افلام حلوه الحقيقه

malek el masry
12-23-2007, 05:59 PM
دي افلام مسلية لتمضية وقت ظريف لكن السينما الحقيقية حاجة تانية

malek el masry
كلام حضرتك رائع وعجبني جدا
بس انا بدخل السينما ليه ؟
اليس من أجل التسلية وقضاء وقت ظريف؟
انا لو هادخل السينما مثلا 100 مرة
فبالتأكيد لن تزيد الأفلام الواقعيه عن 20 فيلم منهم
والباقي استمتاع بسحر الكاميرا والمناظر الخلابه واللحظات الرومانسيه والمواقف الطريف الفكاهيه ....انا مش بشتغل ومنهك القوي طوال الأسبوع علشان اروح اختم الاسبوع بفيلم يزيدني كآبة

معلش ممكن اسأل حضرتك سؤال
حضرتك بتقول ان فيلم تيتانيك زباله ...طيب اما تحب تتفرج علي فيلم ممتع بتشاهد فيلم ايه ؟
,

انا ماعنديش اعتراض علي افلام التسلية. بالعكس دي مطلوبة و محببة و انا شخصيا بحب كتير اقعد اتفرج عليها لان الواحد ماينفعش يقعد يتفرج علي افلام عميقة علي طول

بس المهم اننا نبقي واعيين بان الافلام دي افلام مسلية مش اكثر
والا نعتبرها افلاما عظيمة

فيه افلام عظيمة ولكنها ليست مسلية مثل افلام الاسطورتين السويدي انجمار برجمان و الايطالي انطونيوني لانها افلام مربكة و تتركك و داخلك مشاعر من القلق و الاضطراب و عدم اليقين ازاء الاسئلة الوجودية والفلسفية الكبري التي تطرحها هذه الافلام. اتذكر ان برجمان ذكر ذات مرة انه قصد ان يطرح اسئلة الوجود و الشرط الانساني كلها عبر افلام سينمائية

و حاليا مايكل هانيكا افلامه مزعجة و مقلقة جدا جدا
و ايضا افلام الاسباني بدرو المودوفار


لكن فيه افلام عميقة و بتطرح قضايا مهمة و رؤية انسانية جادة و لغة سينمئية مختلفة لكنها مسلية ايضا زي بعض افلام جودار و فيلليني و برتولوتشي و سكورسيزي و كوبولا و كيشلوفسكي و طبعا هيتشكوك

يعني افلام زي
Casablanca
Godfather
Breathless
My life to live
last emperor
Jules and Jim
Taxi driver
the conformist
raggng bull
Volver
Psycho
vertigo
blue
white
red
one flew over the cukoo's nest
A Clockwork orange
shinning
Odysseh 2000
last tango in paris
Apocalypse now
كلها افلام عميقة و مسلية في الوقت ذاته

و افلام اخري زي

Gangs of newyork
english patient
hours
letters of Iowa-Jima
Pulp fiction
Adaptation
fight club
American beauty
Matrix I
City of God
Leaving las vegas
Lives of others
Vanilla sky
American history X
25th hour
Chinatown
The Pianist(the french movie)
Repulsion
The Conformist
21 grams
Amorres Peros
City of God
Farewell my concubine
White
The double life of veronique
Talk to her
L'Auberge Espagnole
Russian dolls
Paris Je t'aime
Heaven
Matador
My life to live
Frenzy
Sex, lies and videotape
Live flesh
Happiness
Unforgiven
Monster's ball
Bad education
blue velvet
Muloholland Drive
Leaving Las Vegas
American beauty
L.A. Confidential
The lives of others
Fargo
Annie Hall
Casino
Manhattan
Monster
Breaking the waves
The Constant Gardener
Paris, Texas
Amarcord
8 1/2
Blow up
Raging bull
Hirochima mon amour
1984
underground
belle de jour
Irreversible
wild at heart
lost highway
The sheltering sky
Boys don't cry
I stand Alone
Spider
Y Tu Mama Tambien
A short film about love
Eyes wide shut
paths of glory

و دول اللي فاكرهم و بكتبهم من الذاكرة دلوقت

malek el masry
12-23-2007, 06:11 PM
pecaso,

علي فكرة انا نسيت ستانلي كوبريك اللي هو اعظم المخرجين الامريكيين قاطبة و ييجي بعديه هيتشكوك ثم سكورسيزي و كوبولا و التمان

علي العموم كل مخرج من دول هو عالم كامل متكامل ليه مفرداته و همومه و لغته و تفاصيله وده المخرج ال
Auteur
زي مابيسميه الفرنسيون

يعني برجمان فيلسوف حقيقي

انطونيوني فيلسوف لكن من خلال الواقع الاجتماعي

فيلليني ساحر و صانع حياة متكاملة

كيشلوفسكي شاعر

برتولوتشي فنان تشكيلي

كوبريك ثوري

سكورسيزي واقعي ساخط

تروفو فطري

كوبولا ملحمي

كيروساوا اسطوري

وودي الان فانتازي ساخر

بونويل فانتازي عبثي

جودار ثوري

الان رينيه مزيج من الشاعر و الفنان التشكيلي

هيتشكوك مجرم علي طريقةابو تريكة
:-P

El_Ahlawy
12-23-2007, 06:51 PM
malek el masry,

أنا ضد النظام الإقطاعي و الملكي و خاصة في مصر في فترة النلك ، لكن ده لا يمنع إن التعداد السكاني و مشاكل الإنسان كانت أقل بكثير و كان العلاج و الطبابة و من بعدها المشاكل العادية

إنما لو عايز أقارن الفقر دلوقتي و القيمة الشرائية للجنيه ساعتها و أشوف الطبقة الوسطى و هي طبقة الموظفين و العمال و بين نفس الطبقة الآن

الموظف كان قادر انه يجيب شقة و يفتح بيت بمعاش الدولة ، قارن بينها و بين دلوقتي تقدر تجيب شقة و بيت ب 700 جنيه ؟؟

الفقر موجود في كل زمان و حيفضل موجود لأن الإنسان بطبيعته طماه و مستهلك و فردي التفكير.

و الدليل في العالم كله حتلاقي إخراج أي عمل زمان كان بياخد وقته في التفاصيل
مثلآ شوف أي بيت على الطراز القديم حتلاقيه في البيوت العادية فيه شغل و هندسة معمارية و تفاصيل حلوة . هاتلي بيت متوسط الآن فيه أي فن
العربيات نفس الفيلم و الأفلام زيهم
التفاصيل الصغيرة و التعمق بيتطلب وقت و تحليل و تفكير و رواق بال
كل حاجة دلوقتي كوميرشيال أو معمولة للإستهلاك مش للإستمتاع

إنت إخترت أفلام من أفضل الأفلام اللي بأحبها
Godfather
taxi driver
raging bull
pulp fiction

لكن فيه أفلام تقارن بأفلامنا العربية الرومانسية
زي كاسابلانكا
هاتلك أي فيلم يجيب شلل لعماد حمدي و فاتن حمامة أو يحيى شاهين و شكري سرحان

أنا مش متخصص في الإضاءة و أساليب التصوير لكن اللي أعرفه إن زمان كان الأسلوب قريب أوي بين السينما المصرية و الخارجية لأن الكاميرات كانت شبه موحدة و حتى معامل التحميض كانت شركات إيطالية في مصر ساعتها تعمل بتقنيات مناسبة لوقتها

---------------------------

التقنيات الديجيتال شكلها بره اللعبة معاك فحنلغيها من اللعبة لأنها لا تعتمد بأي شكل على السينما و ممكن واحد بيعمل جيمز على الكومبيوتر يعملك نفس التقنيات
---------------------------

و أنا لسه مقتنع إن الأفلام الأميريكية مؤخرآ بقت مملة جدآ على الأقل ليه و أنا عمري ما كنت معجب بأفلام سبيلبرج لأسباب مش فنية لكن بسبب سياسته الصهيونية

فسؤال ليك و لبيكاسو إيه آخر الأفلام الأميريكية المحترمة أو اللي تناسب ذوقكم ؟؟

يعني لو حمشي معاك في كلامك إن أفلام خيري بشارة كان فيها أفلام معقدة للمشاهد هو نفسه غير لأفلام منيلة بستين نيلة
رغبة متوحشة (1991)، آيس كريم في جليم (1992)، أمريكا شيكا بيكا (1993)، حرب الفراولة (1994)، قشر البندق (1995)، إشارة مرور (1995).
قارن دي و بين بنت الباشا أو إبن الجنايني يعني آيس كريم في جليم ده واقع ؟ده واقع على دماغه :lol: :lol:

يعني فيلم زي
American Beauty
اللي بيتكلم عن
Mid life crisis for men
تم وضعه بأسلوب ممتاز للمشاهد مع كمية المشاكل اللي طرحها الفيلم و لم تزعج المشاهد
اللي يفهم الفكرة يفهم و الباقي يستمتع بالفيلم لأنه ممكن يحسسه بنفسه حتى بدون ما يحس انه بيمر بنفس الأزمة

تعالى بقه لفيلم زي يوم حلو يوم مر -- بيعرض حياة الطبقة الفقيرة بشكل واقعي لكن مزعج للمشاهد لأنه بيركز على الحاجات اللي هو نفسيآ قرفان منها

إيه اللي ما يخليهوش فيلم تافه ؟؟

عشان أقدر أتناقش معاك عرفلي إيه اللي يخلي فيلم مش تافه
و إيه اللي يخليه ناجح فنيآ

و هل لو فيلم فشل جماهيريآ يكون ناجح ؟
فيلم زي الجودفازر أو العراب ناجح جماهيريآ و فنيآ و الدليل إن الناس لسه بتشتري الفيلم لحد دلوقتي

فعرفلي المقصود بفيلم كويس عشان نفهم نشرح الأفلام المصري مقارنة بالتعريف بتاعك

malek el masry
12-23-2007, 07:06 PM
El_Ahlawy,

يا رائد يا ناصري
:)

في الاربعينات مصر كانت مجتمع النص في المائة يعني نصف في المائة من لشعب اللي هم الاريستقراط مسيطرين علي 95% من الثورة

الطبقة الوسطي كانت صغيرة جدا

95 %
من الشعب كانوا عبارة عن فلاحين معدمين حفاة بجلاليب مقطعة و اجسام كلتها البلهارسيا و التيفود و الجدري و الكوليرا و مايعرفوش حاجة اسمها كهربا او مجاري او مياه الحنفية

ladyde
12-23-2007, 07:34 PM
95 %
من الشعب كانوا عبارة عن فلاحين معدمين حفاة بجلاليب مقطعة و اجسام كلتها البلهارسيا و التيفود و الجدري و الكوليرا و مايعرفوش حاجة اسمها كهربا او مجاري او مياه الحنفية

_________________


أهو ده بقى إفترى

حال البلد ماكانش إسود كده و بطل دعاية مفترية

مش بقول كانت حلوة و سكر بس كانت أحسنمن دلوقتي مليون مرة

مش حنين للملكية زي مابتقول

لكن إحقاقا للحق

البلد كانت فيها ديموقراطية قد دلوقتي ميت مرة

malek el masry
12-23-2007, 07:49 PM
ladyde,

انا كلامي محدد وواضح

المشكلة انك بتقولي كلامك ده و كل اللي في ذهنك القاهرة و الاسكندرية فقط بينما اصلا الاغلبية الساحقة من الشعب المصري انذاك كانوا بيعيشوا في الريف خارج القاهرة و الاسكندرية


اقتصاديا و اجتماعيا الفوارق بين الطبقات كانت شديدة الاتساع
و غالبية الشعب كانوا من الفلاحين المعدمين المفتقرين للحد الادني من الدخل و الخدمات

الرعاية الصحية كانت منعدمة و التعليم كان للقادرين فقط اللي عددهم لا يتجاوز ال 5% من الشعب المصري

تقريبا ماكانش فيه طبقة وسطي

عبد الناصر صاحب رائد هو اللي عمل تعليم مجاني و مستشفيات عامة مجاني و توظيف للناس في مشاريع القطاع العام و ملك الفلاحين الاجراء الاراضي و دخل الكهربا و الماء النظيف للريف


البلد كانت فيها ديموقراطية قد دلوقتي ميت مرة


ماكانتش ديمقراطية. كان حكم استبدادي برضه: احكام عرفية- انتخابات مزورة-تلاعب بالقوانين و الدساتير- قوانين مقيدة للحريات- حكومات اقلية مفروضة علي الشعب- و الاهم سيطرة اجنبية علي مقدرات البلاد

ازاي تكون ديمقراطية و حزب الوفد اللي هو حزب الاغلبية الشعبية لم
يسمح له بتولي الحكم الا فترات محدودة جدا لم تتجاوز في مجموعها ال 6 سنوات من اصل 22 سنة هي عمر العصر الليبرالي الملكي في مصر(1923-1952)؟

هي كانت ليبرالية مقيدة يعني لا تختلف كثيرا عن وضعنا الحالي
الا في جزئية هامة جدا و هي ان السلطة لم تحتكر المجال السياسي. هي اللي بتحكم علي طول لكنها سمحت بوجود احزاب سياسية حقيقية تعبر عن مصالح الطبقات الاجتماعية المختلفة يعني الاحرار الدستوريين بيعبروا عن مصالح الارستقراط كبار ملاك الاراضي الزراعية و الحزب السعدي بيعبر عن مصالح البورجوازية الراسمالية الصناعية
بينما الوفد بيمثل الحركة الوطنية المناهضة للاستعمار و الاخوان المسلمين بيمثلوا التيار الاسلامي و حزب مصر الفتاة بيمثل القومية المصرية بشكل يميني فاشي و الاثنين وجدوا قواعد دعمهم الاجتماعي داخل صفوف الطبقة الوسطي سواء المدينية او الريفية

و ان كانت الحركات اليسارية كانت مجرمة و محظورة ومنزوع عنها الشرعية بحكم القانون يعني الطبقة العاملة لم يكن هناك من يمثل مصالحها بشكل قانوني و شرعي


الديمقراطية حاجة تانية

malek el masry
12-23-2007, 08:18 PM
هاتلك أي فيلم يجيب شلل لعماد حمدي و فاتن حمامة أو يحيى شاهين و شكري سرحان

دعاء الكروان- الباب المفتوح- صراع في الوادي- شباب امراة-
كل دي افلام كلاسيكية حلوة


أنا مش متخصص في الإضاءة و أساليب التصوير لكن اللي أعرفه إن زمان كان الأسلوب قريب أوي بين السينما المصرية و الخارجية لأن الكاميرات كانت شبه موحدة و حتى معامل التحميض كانت شركات إيطالية في مصر ساعتها تعمل بتقنيات مناسبة لوقتها

ده لغاية الستينات لكن لما صاحبك جيمي امم السينما عمل معامل مصرية و كانت كويسة جدا في وقتها لكن لما وصلنا للثمانينات كانت قد تهالكت و انتهي عمرها الافتراضي و لم تخضع لاي صيانة او تجديد

و أنا لسه مقتنع إن الأفلام الأميريكية مؤخرآ بقت مملة جدآ على الأقل ليه و أنا عمري ما كنت معجب بأفلام سبيلبرج لأسباب مش فنية لكن بسبب سياسته الصهيونية

فسؤال ليك و لبيكاسو إيه آخر الأفلام الأميريكية المحترمة أو اللي تناسب ذوقكم ؟؟

لو قصدك في السنتين الاخيرتين فقط

letters from iowa-jima
Capote
Little Miss Sunshine
No country for old men
The Darjeeling Limited
Crash
Lost in translation
Munich
Broken flowers

يعني لو حمشي معاك في كلامك إن أفلام خيري بشارة كان فيها أفلام معقدة للمشاهد هو نفسه غير لأفلام منيلة بستين نيلة
رغبة متوحشة (1991)، آيس كريم في جليم (1992)، أمريكا شيكا بيكا (1993)، حرب الفراولة (1994)، قشر البندق (1995)، إشارة مرور (1995).
قارن دي و بين بنت الباشا أو إبن الجنايني يعني آيس كريم في جليم ده واقع ؟ده واقع على دماغه
انا شايف ان ايس كريم في جليم و قشر البندق افلام حلوة و مش تافهة
اي نعم مش زي رائعة خيري بشارة الطوق و الاسورة اللي اخرجه عام
1986
لكنها افلام حلوة برضه
و اصلا قشر البندق مستوحي من الفيلم الامريكي الجميل و الشهير(انهم يقتلون الجياد اليس كذلك؟)
They Shoot Horses, Don't They?

تعالى بقه لفيلم زي يوم حلو يوم مر -- بيعرض حياة الطبقة الفقيرة بشكل واقعي لكن مزعج للمشاهد لأنه بيركز على الحاجات اللي هو نفسيآ قرفان منها

إيه اللي ما يخليهوش فيلم تافه ؟؟

مش تافه لان موضوعه مش تافه لكنه فيلم مش جيد لانه عجز عن تقديم رؤية جميلة و قوية لهذا الموضوع

قارنه مثلا بفيلم احلام هند و كاميليا لمخرجي المفضل محمد خان

pecaso
12-24-2007, 01:20 AM
malek el masry,

المشكله انك بتدخل جوه دماغي وطلع ال انا مش عارف اطلعه

منك لله يا مالك :lol:

كمال حسن
12-24-2007, 10:54 AM
:twisted:

El_Ahlawy
12-24-2007, 12:57 PM
هاتلك أي فيلم يجيب شلل لعماد حمدي و فاتن حمامة أو يحيى شاهين و شكري سرحان

دعاء الكروان- الباب المفتوح- صراع في الوادي- شباب امراة-
كل دي افلام كلاسيكية حلوة


أنا مش متخصص في الإضاءة و أساليب التصوير لكن اللي أعرفه إن زمان كان الأسلوب قريب أوي بين السينما المصرية و الخارجية لأن الكاميرات كانت شبه موحدة و حتى معامل التحميض كانت شركات إيطالية في مصر ساعتها تعمل بتقنيات مناسبة لوقتها

ده لغاية الستينات لكن لما صاحبك جيمي امم السينما عمل معامل مصرية و كانت كويسة جدا في وقتها لكن لما وصلنا للثمانينات كانت قد تهالكت و انتهي عمرها الافتراضي و لم تخضع لاي صيانة او تجديد

و أنا لسه مقتنع إن الأفلام الأميريكية مؤخرآ بقت مملة جدآ على الأقل ليه و أنا عمري ما كنت معجب بأفلام سبيلبرج لأسباب مش فنية لكن بسبب سياسته الصهيونية

فسؤال ليك و لبيكاسو إيه آخر الأفلام الأميريكية المحترمة أو اللي تناسب ذوقكم ؟؟

لو قصدك في السنتين الاخيرتين فقط

letters from iowa-jima
Capote
Little Miss Sunshine
No country for old men
The Darjeeling Limited
Crash
Lost in translation
Munich
Broken flowers

يعني لو حمشي معاك في كلامك إن أفلام خيري بشارة كان فيها أفلام معقدة للمشاهد هو نفسه غير لأفلام منيلة بستين نيلة
رغبة متوحشة (1991)، آيس كريم في جليم (1992)، أمريكا شيكا بيكا (1993)، حرب الفراولة (1994)، قشر البندق (1995)، إشارة مرور (1995).
قارن دي و بين بنت الباشا أو إبن الجنايني يعني آيس كريم في جليم ده واقع ؟ده واقع على دماغه
انا شايف ان ايس كريم في جليم و قشر البندق افلام حلوة و مش تافهة
اي نعم مش زي رائعة خيري بشارة الطوق و الاسورة اللي اخرجه عام
1986
لكنها افلام حلوة برضه
و اصلا قشر البندق مستوحي من الفيلم الامريكي الجميل و الشهير(انهم يقتلون الجياد اليس كذلك؟)
They Shoot Horses, Don't They?

تعالى بقه لفيلم زي يوم حلو يوم مر -- بيعرض حياة الطبقة الفقيرة بشكل واقعي لكن مزعج للمشاهد لأنه بيركز على الحاجات اللي هو نفسيآ قرفان منها

إيه اللي ما يخليهوش فيلم تافه ؟؟

مش تافه لان موضوعه مش تافه لكنه فيلم مش جيد لانه عجز عن تقديم رؤية جميلة و قوية لهذا الموضوع

قارنه مثلا بفيلم احلام هند و كاميليا لمخرجي المفضل محمد خان

دكتور

طيب جاوبني على تعريفك الشخصي للفيلم المميز و غير التافه عشان أقدر أبني المنطق بتاعي
لأنه بدون شك لو أنت شايف ان آيس كريم في جليم فيلم مش تافه و ملاكي إسكندرية فيلم تافه يبقى الموضوع نسبي بدرجة إمتياز

يعني فين الإضاءة المميزة و الإخراج الغير تافه في آيس كريم في جليم ؟ طبعآ غير انع بعيد عن الواقعية بشكل كبير

بالنسبة للأفلام الأمريكية اللي طرحتها زي
letters from iowa-jima
Capote
Little Miss Sunshine
No country for old men
The Darjeeling Limited
Crash
Lost in translation
Munich
Broken flowers

أنا شفت 4-5 أفلام منها و بما ان الأوسكار بقى بيختار ان الأفلام دي أحسن ما قدم ده شخصيآ دليل ليه ان الأمريكان فلسوا فنيآ

أنا من محبين سكورسيزي و في رأيي إن
The Departed
هو أفضل فيلم أميركي في ال 7 سنين اللي فاتت كفيلم بعيد عن التقنيات لأن الأفضل حيظل
Lord of the ring
من ناحية الإنتاج و القصة و كل حاجة فيه، فيلم بعيد عن المنافسة لوقت طويل جدآ

لكن أنا إخترت ذي ديبارتد لأنه الأقرب لأسلوب إختيارك للأفلام ، و في كمان فيلم مميز أوي
Apocalypto
ميل جيبسون عمل شغل ممتاز لم يتم تقديره لأسباب لا أعرفها و قد يكون نوع من الضغط اليهودي على ميل جيبسون بسبب فيلم
passion of the christ
اللي وضح فيه إن اليهود هم أصحاب المسئولية الأولى في صلب السيد المسيح و أعطت الكنائس الأمريكية و الكندية تذاكر مجانية لرعاياها لمشاهدة الفيلم خاصة بعد مسامحة الفاتيكان لليهود و التصريح انهم ليسوا قتلة المسيح
و دي نظريتي أنا و قد أكون مخطيء

حستنى منك تعريف ليعني إيه فيلم واقعي جيد و إيه مزاياه

و سؤال تاني ما جاوبتنيش عليه

الموظف و الطبقة الوسطى زمان كانت قادرة انها تعيش و تفتح بيت و تربي عيال من معاشها ، هل تستطيع نفس الطبقة اللي إختف أصلآ فعل نفس الشيء ؟؟
و هل في رأيك ان ساعات العمل تؤثر على تقييم الإنسان لأي عمل فني و مش سينمائي بس ؟
يعني زمان كانت الناس بترجع بيوتها في البدري و ما تباتش في الشغل زينا

مش ده عامل مؤثر في عمق الأفلام برضه ؟

malek el masry
12-24-2007, 04:56 PM
طيب فيلم زي ماتريكس (بعيدا عن لقطات الاكشن فيه ) ليه مش وضعته في المجموعه الاولي ووضعته ثانيا ؟ الفيلم مليااان رموز وبيطرح فكرة لم يتم تداولها من قبل علي ما اتذكر


ما انا قلت عليه فيلم كويس

فيلم زي
BEAUTIFUL MIND
لراسل كرو ...اجده فيلم رائع
طيب

فيلم كويس برضه بس خللي بالك اني كنت بكتب من الذاكرة
:)

كلينت ايستوود :رأيك فيه ايه انا شخصيا لا احبه بس احب اعرف رأيك فيه ولماذا دائما له حظوظ كبيرة في اي فيلم يصنعه دون غيره من المخرجين الاخرين في الحصول علي جوائز الأوسكار ...

اوفر ريتيد في رايي و محظوظ جدا بالنسبة للجوايز لكن هو اخرج فيلمين كويسين
uunforgiven
Mystic river
و اخرج فيلم ممتاز
Letters of Iowa-Jima

احب اعرف رأيك في افلام الأوسكار احيانا اشعر ان افلام ضعيفه تنال جوائز وهناك اقوي منها بكثير لم يدخل المنافسه حتي

الاوسكار زيها زي نوبل زي اي مسابقة في العالم ساعات بتبقي فيه اختيارات غلط و تحيزات في الاختيارات لدوافع سياسية او ثقافية او حتي مهنية لكن في المقابل فليها اختيارات كثيرة صائبة
علي العموم انا مابهتمش قوي بالاوسكار لانه خاص بالسينما الامريكية فقط و بعتبر جوائز مهرجان كان الانعكاس الادق للسينما العالمية

يعني مثلا فيلم الام المسيح اجده فيلم رائع ولم يحصل علي حقه وقتها وحورب بشده

فيلم جيد لكن الكنائس البروتستانتية حاربته بالرغم من دعم الكنيسة الكاثوليكية له

فكرة فيلم شيفرة دافنشي ...؟
رأيك فيه ايك
وما حدث لهذا
لم

فيلم ردئ جدا علي المستوي الفني و الفكري و رواية دان براون الماخوذ عنها الفيلم و اللي حققت نجاح ساحق رواية تعبانة و هابلة

واحب أعرف رأيك في حريه الابداع ..وتناولها لأفكار جريئة كما يقال .

انا مع حرية الابداع طبعا. لا فن حقيقي بدون حرية للفنان

..زي فيلم فلادلفيا مثلا (وناس قالت عنه انه من الممكن تصنيفه سينما واقع ) ايه رأيك فيه ؟
وهل فيلادلفيا يستحق هذه الزيطة الضخمه التي صاحبته ولا تزال تحوم حوله

يعني
انا ماحبيتوش بس فيه ناس بتحبه

malek el masry
12-24-2007, 05:21 PM
طيب جاوبني على تعريفك الشخصي للفيلم المميز و غير التافه عشان أقدر أبني المنطق بتاعي
لأنه بدون شك لو أنت شايف ان آيس كريم في جليم فيلم مش تافه و ملاكي إسكندرية فيلم تافه يبقى الموضوع نسبي بدرجة إمتياز

يعني فين الإضاءة المميزة و الإخراج الغير تافه في آيس كريم في جليم ؟ طبعآ غير انع بعيد عن الواقعية بشكل كبير

مش لازم كل الافلام تبقي واقعية عشان تكون مش تافهة
فيه مدارس تانية زي الرمزية و التجريدية و الفانتازيا و ال
cinema noir و الواقعية السحرية و غيره

قشرالبندق فيه رمزية شديدة ضد اليات المجتمع الراسمالي الاستهلاكي

اما ايس كريم في جليم فده حالة مش قصة. حالة كده فيها عذوبة و شجن
و شخصيات مرسومة حلو و مشاعر دافئة و كاركترات جديدة زي اشرف عبد اباقي و علي حسنين(نور و زرياب ا
لمستوحيان من الثنائي الشهير
احمد فؤاد نجم و الشيخ امام


بالنسبة للأفلام الأمريكية اللي طرحتها زي
letters from iowa-jima
Capote
Little Miss Sunshine
No country for old men
The Darjeeling Limited
Crash
Lost in translation
Munich
Broken flowers

أنا شفت 4-5 أفلام منها و بما ان الأوسكار بقى بيختار ان الأفلام دي أحسن ما قدم ده شخصيآ دليل ليه ان الأمريكان فلسوا فنيآ

يعني ده افلاس؟ و افلام احمد حلمي و السقا هي اللي كويسة؟
:lol:

مالهاالافلام اللي ذكرتها دي؟ افلام كويسة و دول في السنتين الاخيرتين بس

يكفي بس
lost in translation
letters from iowa-jima
دول رائعتين

أنا من محبين سكورسيزي و في رأيي إن
The Departed

هو أفضل فيلم أميركي في ال 7 سنين اللي فاتت كفيلم بعيد عن التقنيات

انا نسيته. هو فيلم حلو فعلا

لأن الأفضل حيظل
Lord of the ring
من ناحية الإنتاج و القصة و كل حاجة فيه، فيلم بعيد عن المنافسة لوقت طويل جدآ

مع احترامي الشديد لرايك بس ده فيلم اي كلام في رايي لو وضعنا جانبا شغل الجرافيكس و الكلام ده


، و في كمان فيلم مميز أوي
Apocalypto
ميل جيبسون عمل شغل ممتاز لم يتم تقديره لأسباب لا أعرفها و قد يكون نوع من الضغط اليهودي على ميل جيبسون بسبب فيلم
passion of the christ
اللي وضح فيه إن اليهود هم أصحاب المسئولية الأولى في صلب السيد المسيح و أعطت الكنائس الأمريكية و الكندية تذاكر مجانية لرعاياها لمشاهدة الفيلم خاصة بعد مسامحة الفاتيكان لليهود و التصريح انهم ليسوا قتلة المسيح
و دي نظريتي أنا و قد أكون مخطيء

فيلم ابوكاليبتو ضعيف جدا فنيا فعلا و خصوصاالسيناريو
الحاجة الوحيدة المميزة فيه كانت المكياج و رشح للاوسكار عنها فعلا
لكن الفيلم فشل نقديا و جماهيريا في شباك التذاكر
ماحدش ظلم ميل جيبسون. الفيلم اخد اللي يستحقه

حستنى منك تعريف ليعني إيه فيلم واقعي جيد و إيه مزاياه

واقعي يعني بينطلق من هم اجتماعي معين لكن تتعدد الاساليب المختلفة
لطرح هذا الهم

فيه الواقعية الكلاسيكية زي صلاح ابو سيف كده

فيه الواقعية الجديدة القائمة علي الترميز شوية زي عاطف الطيب و محمد خان و فيليني و انطونيوني و افلام زي الحرام و البوسطجي و للحب قصة اخيرة مثلا

فيه الواقعية السحرية زي فيلم شئ من الخوف كده

فيه الواقعية التجريدية زي فيلم المستحيل او سمع هس مثلا

و فيه الواقعية العبثية زي الافوكاتو و افلام رافت الميهي


و سؤال تاني ما جاوبتنيش عليه

الموظف و الطبقة الوسطى زمان كانت قادرة انها تعيش و تفتح بيت و تربي عيال من معاشها ، هل تستطيع نفس الطبقة اللي إختف أصلآ فعل نفس الشيء ؟؟
و هل في رأيك ان ساعات العمل تؤثر على تقييم الإنسان لأي عمل فني و مش سينمائي بس ؟
يعني زمان كانت الناس بترجع بيوتها في البدري و ما تباتش في الشغل زينا

مش ده عامل مؤثر في عمق الأفلام برضه ؟

يا ابو رائد الطبقة الوسطي و الافندية دول كانت قد ايه نسبتهم من الشعب المصري زمان؟ كانت نسبة قليلة لان اغلبية الشعب كانوا فلاحين معدمين

الطبقة الوسطي حجمها زاد بعدين

يبقي وفقا لنظريتك اللي بتربط القدرة علي تذوق السينما بالظروف الاقتصادية و الاجتماعية

القدرة دي المفروض تكون احسن دلوقت لان الظروف دي بقت احسن بالنسبة لعامة الشعب

Red Alert
12-24-2007, 08:18 PM
ما ارتحتش كمشاهد لآيس كريم في جليم ولا لقشر البندق .. مدحت العدل باحس إنه مباشر وبيزعق في سيناريوهاته (قشر البندق على سبيل المثال).. ورجع كررها تاني في تجارياته اللي جت بعد كدة .. زي مافيا..أما آيس كريم في جليم فلم يخل من التحذلق كما شفته كمتفرج.. يمكن يكون العتب ع النظر!

لكن الاتنين بصراحة أرحم بكتير من فيلم محمد كامل القليوبي "أحلام مشروعة" .. وفيلم هشام أبو النصر "العصابة" .. الاتنين محاضرتين سياسيتين سمجتين وتنطع بصري وأعتقد إن ناس كتيرة لما حتشوفهم حتندم على الهجوم العنيف والضاري على سينما المقاولات ورموزها صلاح سري وناصر حسين وسيد سيف!

ladyde
12-24-2007, 08:34 PM
صلاح سري وناصر حسين وسيد سيف!

مين دول :shock: :shock: :shock:

pecaso
12-24-2007, 08:38 PM
صلاح سري وناصر حسين وسيد سيف!

مين دول :shock: :shock: :shock:

جبتيهم منين دول عمال ادور علي اساميهم :shock:

Red Alert
12-24-2007, 08:55 PM
صلاح سري ، ناصر حسين ، سيد سيف وغيرهم ثلاثة من المخرجين ارتبطت أسماؤهم بما عرف في الثمانينات بـ"سينما المقاولات" .. وهي عبارة عن أفلام "فيديو" أكثر ما هي أفلام سينما متواضعة القيمة والتكلفة أيضاً ، رغم أن بعض هؤلاء -في حوار نشرته أخبار النجوم في منتصف التسعينيات- كانوا يقولون أن سينماهم "كامل العدد" وأن أفلامهم كانت بتكسر الدنيا في السينمات..

ما بين الكوميديا والأكشن تحركت هذه النوعية من الأفلام وهي النوعية المطلوبة في سوق الفيديو في هذه المرحلة..

ارتبطت أسماء هذه الهوجة بأشخاص دخلوا الفن بفلوسهم زي عماد محرم ، وممثلين من أمثال ضياء الميرغني وسميرة صدقي ونبيلة كرم ، وتورط معهم عدد من النجوم في تلك الأفلام..

الأفلام دي كانت بتتعمل "حلواني" قصة من هنا على قعدة من هنا وكله في الفورتي فورتي .. بعض تلك الأفلام دي كان بيتصور في أسبوعين.. وبرر دة ناصر حسين في حديثه لنفس المجلة المذكورة بقوله "أنا راجل منظم جداً".. وبالتالي أفلامه ما بتاخدش وقت طويل في تجهيزها..

انتهت الهوجة دي مع الوقت بالكساد اللي أصاب الصناعة السينمائية قبل إسماعيلية رايح جاي .. ولكنها ما كانتش بالسوء الفاضح اللي كانت عليه تجربة أفلام التليفزيون التجارية من عينة "رجل له ماض" و "أبناء الشيطان".. ولم يبق من أفلام المقاولات بعد وفاة "ناصر حسين" و"صلاح سري" سوى تلك التي تعرضها علينا ليل نهار "دريم" و"روتانا سينما" و"ميلودي أفلام" لملء ساعات الإرسال وتعويض الفلس الفني والسينمائي لهذه القنوات!

والله أعلم..

pecaso
12-24-2007, 08:59 PM
Red Alert,

دول مخلفات فترة التمانينات يا راجل

عماد محرم ويوسف منصور يمكن اسمع عنهم بس المخرجين ال قلت عليهم اول مرة اسمع عنهم في حياتي

malek el masry
12-24-2007, 10:10 PM
ما ارتحتش كمشاهد لآيس كريم في جليم ولا لقشر البندق .. مدحت العدل باحس إنه مباشر وبيزعق في سيناريوهاته (قشر البندق على سبيل المثال).. ورجع كررها تاني في تجارياته اللي جت بعد كدة .. زي مافيا..أما آيس كريم في جليم فلم يخل من التحذلق كما شفته كمتفرج.. يمكن يكون العتب ع النظر!

لكن الاتنين بصراحة أرحم بكتير من فيلم محمد كامل القليوبي "أحلام مشروعة" .. وفيلم هشام أبو النصر "العصابة" .. الاتنين محاضرتين سياسيتين سمجتين وتنطع بصري وأعتقد إن ناس كتيرة لما حتشوفهم حتندم على الهجوم العنيف والضاري على سينما المقاولات ورموزها صلاح سري وناصر حسين وسيد سيف!

اعتقد ان ايس كريم في جليم و قشر البندق حاجة و مافيا حاجة تانية خالص

مافيا خطابية و مباشرة ايوه و الاسوا انه فكر سياسي رجعي و تافه كمان يجرد الوطنية من اي مدلول اجتماعي او سياسي او انساني

انما ايس كريم في جليم و قشر البندق مش كده خالص

و مش عارف الصراحة فين المباشرة دي اللي في قشر البندق.
:shock: :shock:
دي مسابقة اكل و مراهنات و حميد الشاعري
:)

مدحت العدل في الاول كان كويس انما بعد كده اتغير كتير و تدهور مستواه
و ايس كريم في جليم و قشر البندق من اوائل افلامه

malek el masry
12-24-2007, 10:21 PM
صلاح سري ، ناصر حسين ، سيد سيف وغيرهم ثلاثة من المخرجين ارتبطت أسماؤهم بما عرف في الثمانينات بـ"سينما المقاولات" .. وهي عبارة عن أفلام "فيديو" أكثر ما هي أفلام سينما متواضعة القيمة والتكلفة أيضاً ، رغم أن بعض هؤلاء -في حوار نشرته أخبار النجوم في منتصف التسعينيات- كانوا يقولون أن سينماهم "كامل العدد" وأن أفلامهم كانت بتكسر الدنيا في السينمات..

ما بين الكوميديا والأكشن تحركت هذه النوعية من الأفلام وهي النوعية المطلوبة في سوق الفيديو في هذه المرحلة..

ارتبطت أسماء هذه الهوجة بأشخاص دخلوا الفن بفلوسهم زي عماد محرم ، وممثلين من أمثال ضياء الميرغني وسميرة صدقي ونبيلة كرم ، وتورط معهم عدد من النجوم في تلك الأفلام..

الأفلام دي كانت بتتعمل "حلواني" قصة من هنا على قعدة من هنا وكله في الفورتي فورتي .. بعض تلك الأفلام دي كان بيتصور في أسبوعين.. وبرر دة ناصر حسين في حديثه لنفس المجلة المذكورة بقوله "أنا راجل منظم جداً".. وبالتالي أفلامه ما بتاخدش وقت طويل في تجهيزها..

انتهت الهوجة دي مع الوقت بالكساد اللي أصاب الصناعة السينمائية قبل إسماعيلية رايح جاي .. ولكنها ما كانتش بالسوء الفاضح اللي كانت عليه تجربة أفلام التليفزيون التجارية من عينة "رجل له ماض" و "أبناء الشيطان".. ولم يبق من أفلام المقاولات بعد وفاة "ناصر حسين" و"صلاح سري" سوى تلك التي تعرضها علينا ليل نهار "دريم" و"روتانا سينما" و"ميلودي أفلام" لملء ساعات الإرسال وتعويض الفلس الفني والسينمائي لهذه القنوات!

والله أعلم..

افلام المقاولات ماكانتش بتتعرض في السينمات اصلا و انما بتتوزع فيديو علي طول و الهدف هو تلبية احتياجات السوق في الخليج و طلبه المتزايد علي افلام الفيديو

نجوم افلام المقاولات الابرز هم يونس شلبي وسمير غانم و سعيد صالح و اسعاد يونس و لبلبة و عايدة رياض و وحيد سيف و ليس فقط سميرة صدقي و عماد محرم و ضياء الميرغني

و ابرز مخرجيها ناصر حسين و حسن الصيفي و سيد سيف و محمود فريد

Us Palermo Lover
12-26-2007, 09:59 AM
الفيلم الوحيد اللي دخلته كان خارج علي القانون

وكنت متحمس جدا ادخل فيلمي الجزيرة وهي فوضي بس بعد كلام مالك الحماس قل كالعادة :)

خارج علي القانون .. اللي يسمع اسم الفيلم لاول وهلة هيقول انه فيلم سياسي او بيهاجم الحكومة لكنه غير كده خالص وهو مجرد قصة عاديه لشخص اجبرته الظروف انه يكون تاجر مخدرات وبيستخدم الطرق الشرعيه او غير الشرعيه للانتقام لابوه مع اصدادمه بالشرطة وفي الآخر ي بيبان له ان الكل بيخدعه .. يعني مجرد قصة عاديه متخليش الواحد يتطرق لموضوع او قضية بتشغل الناس

Us Palermo Lover
12-26-2007, 10:07 AM
لكن بالمناسبة اول مرة يعجبني ادء كريم عبد العزيز كان في الفيلم ده وشكله اتحسن

زي غادة عادل اللي طول عمري شايفها مفهاش اي موهبة وبتعتمد علي شكلها .. لكن فيلم " في شقة مصر الجديدة " اداءها فيه اتحسن بصورة واضحة جدا

El_Ahlawy
12-26-2007, 01:28 PM
malek el masry,


أتفق معاك تمامآ في أسماء الممثلين بتوع السينما الهايفة و الهابطة

طيب تقريبآ فهمت نظرتك للأفلام الواقعية اللي مش هايفة

بكده يبقى الأفلام دي ممكن تتناسب مع رأيك

المصير
عمارة يعقوبيان مع انك قلت انه ما عجبكش لكنه يحمل كل مصادر التميز اللي قلتها
دم الغزال
ليلة سقوط بغداد ( بيحمل نظرة واقعية ممتازة عن حالتنا العسكرية
واحد من الناس
سهر الليالي
اللعب مع الكبار
حتى بخيت و عديلة الجردل و الكنكة في حاجات ممتازة عن النظام الإنتخابي
اللي بالي بالك ( الفكرة ممتازة و حتى تنفيذها في رأيي كان مميز أوي
النوم في العسل
نهر الخوف

بعدين كيف تستطيع تقييم الأفلام الكوميدية ؟ لأنها حتكون يا إما كوميديا الموقف أو الشخصية نفسها فيلم زي
Nothing to lose
اللي بعده كوميديا ممتازة ممكن يكون ممكانه أفلام كثيرة كوميدي تم عملها مؤخرآ

يعني ما تقدرش تقارن شاوشانك ريديمبشين
أو
Green mile
departed
American Beauty

بأي فيلم كوميدي. ممكن نقارن أفلام كوميدية واقعية عجبتك بشبيه لها في السينما المصرية مؤخرآ

في الليستة اللي حطيتها كان الوحيد اللي فيه كوميديا هو
Lost in translation
و لو أن الفيلم لم يكن كما تم التسويق له و ده في رأيي تمثيل بيل ميراي عادي جدآ زيه زي أي فيلم عامله قبل كده و سكارلت جوهانسن كانت كويسة لكن مش بالشكل اللي يخلي الفيلم يبقى روعة
القصة هي أفضل ما في الفيلم و تفاصيل الحوار

--------------

بالنسبة للطبقات الوسطى و الدنيا لا أعتقد إن النسبة زي ما انت حاطط 5% مقابل 95% و السؤال
الأفلام اللي بتنعرض مين اللي بيشوفها ؟

مبدئيآ المشاهد حيكون من الطبقة اللي تقدر تدفع تمن فرجة الفيلم ككماليات و يتبقى نوعية الأفلام اللي بيتم إنتاجها عشان المسابقات بدون الإهتمام بالجانب الجماهيري و ده أكبر غلط لأنك ممكن تعمل الإثنين و ده اللي يوسف شاهين فضل يغلط فيه دايمآ

عمل فيلم جماهيري رائع و ناجح فنيآ و هو المصير و الناصر صلاح الدين
و عمل السلسلة العميقة بتاعة قصة حياته اللي لازم يخشها يكون محلل علم نفس
زي حدوتة مصرية و إسكنرية كمان و كمان و إسكندرية نيو يورك

أنا في رأيي اننا بنتطور بشكل جيد في أفلامنا و خاصة اني بتفرج على أفلام أسباني كثيرة و خاصة الكوميدي منها و هي مش بعيدة عن أسلوبنا أبدآ

يتبقى الجانب التقني اللي أنا ما أفهمش فيه ولا أفتي فيه و هو الإضاءة و المونتاج و خلافه

أنا أقدر أقيم القصة و الأداء و الحبكة الدرامية و الإهتمام بالتفاصيل و دول شايفهم تطوروا بشكل ممتاز مؤخرآ
إنما الحاجات التانية دي أسيبها ليكم أو للي فاهمين فيها لأني غير ضليع في الموضوع التقني

malek el masry
12-26-2007, 11:30 PM
يظهر ان الواحد لازم يشوف الفيلم مرتين عشان يكون راي دقيق

هيه فوضي كرهته بعد المشاهدةا لثانية

الجزيرة كنت شفته مرة واحدة و بناء عليها قلت رايي السابق لكن بعد مشاهدته لثاني مرة كونت راي مختلف

اعتقد ان فيلم الجزيرة اقوي افلام الموسم

مستوحي من قصة عزت حنفي امبراطور النخيلة في اسيوط و يقدم دراما انسانية حول مافيا تجارة المخدرات والسلاح و فساد اجهزة الامن في الصعيد

اداء تمثيلي جيد من الجميع: احمد السقا و هند صبري و خالد الصاوي و محمود ياسين.


فيه عناية بالتفاصيل في الديكور و الاضاءة. المونتاج جيد جدا و جعل ايقاع الفيلم متدفق ونابض. الشخصيات درامية و حية بدون اكليشيهات او قوالب جاهزة

سيناريو ممتع من محمد دياب وجمل حوارية رشيقة

و شريف عرفة يستعيد ذكريات تالقه بعد سنوات طويلة من الركود

malek el masry
12-26-2007, 11:47 PM
عمل فيلم جماهيري رائع و ناجح فنيآ و هو المصير

:shock: :shock:
يا راجل حرام عليك ده فيلم تعبان ملة

بقي بالذمة ابن رشد يطلع يرقص و يقول اصلي بحب الحياة
:lol: :lol: :lol:

يوسف شاهين حب يصفي حساباته مع التيار الاسلامي اللي اوقفله فيلم المهاجر و سحبه من دور العرض بامر القضاء راح عمل المصير عشان يهاجمهم فيه

و الفيلم طبعا تزوير تاريخي فاضح لان ماكانش فيه جماعات اصولية متطرفة في الاندلس في العصر ده بالشكل اللي صوره الفيلم

الفيلم مافيهوش غير غنوة منير

malek el masry
12-26-2007, 11:58 PM
الفيلم الوحيد اللي دخلته كان خارج علي القانون

وكنت متحمس جدا ادخل فيلمي الجزيرة وهي فوضي بس بعد كلام مالك الحماس قل كالعادة :)



ادخل الجزيرة يا سحس

:)

Krzysztof Kieslowski
12-27-2007, 12:20 AM
dolat 3amlo fe masr site zy netflix elnas mmkn t2gr aflam wa bta3 !!!

www.egdvd.com

malek el masry
12-27-2007, 12:49 AM
El Presidente,

ايوه بس الداتا بيز محدودة قوي
ماتجيش 1/20 من الافلام اللي علي ال
netflix

Krzysztof Kieslowski
12-27-2007, 01:18 AM
malek el masry,

akeed tb3an, bs khatwa kowayesa :?:

malek el masry
12-27-2007, 01:31 AM
El Presidente,

طريق الالف ميل يبدا بخطوة يعني؟

بس انا خايف نفضل في الخطوة دي علي طول
:)

Krzysztof Kieslowski
12-27-2007, 01:50 AM
malek el masry,

msh mohem, elmohem enohom bada2o y3mlo haga :)

El_Ahlawy
12-27-2007, 11:25 AM
malek el masry,

شفتوا منين ؟ أنت في مصر دلوقتي ؟
منورة الفيلا
:lol: :lol:

malek el masry
12-27-2007, 03:15 PM
El_Ahlawy,

aniwa ana fi masr el ma7rousa ba2ali fatra :)

El_Ahlawy
12-27-2007, 03:36 PM
malek el masry,

طب كويس انك بدأت نظرة تفاؤلية للإخراج و الإنتاج المصري
خش الفيلم مرة ثالثة بقه تقول إن مصر حتضرب أمريكا قريبآ جدآ بالقبقباب

:lol: :lol:

طب خلي بالك بقه لحسن في ناس في مجمع التحرير نفسها تشوفك و تدردش معاك شوية و جايز يبيتوك هناك لأنهم عايزين يعيدوا تمثيل فيلم إحنا بتوع الأوتوبيس و الكرنك و بيقولوا وشك فوتوجونيك أوي
:lol: :lol:

و يجعله أمن

malek el masry
12-27-2007, 04:36 PM
malek el masry,

طب كويس انك بدأت نظرة تفاؤلية للإخراج و الإنتاج المصري
خش الفيلم مرة ثالثة بقه تقول إن مصر حتضرب أمريكا قريبآ جدآ بالقبقباب

:lol: :lol:

طب خلي بالك بقه لحسن في ناس في مجمع التحرير نفسها تشوفك و تدردش معاك شوية و جايز يبيتوك هناك لأنهم عايزين يعيدوا تمثيل فيلم إحنا بتوع الأوتوبيس و الكرنك و بيقولوا وشك فوتوجونيك أوي
:lol: :lol:

و يجعله أمن

:mad: :lol: :lol:

Red Alert
12-28-2007, 04:37 PM
عارف يا مالك إحنا مشكلتنا إيه بصفة عامة..

عندنا أفلام جامدة وقوية وبتناقش قضايا ، وعندنا أفلام تانية "حلوة" في شكلها وصورتها كسينما ومبتناقشش قضايا كبيرة وبتخلو من الشعارات..

عندنا مخرجين "شطار" و"صنايعية" يقدروا يعملوا شريط سينمائي "حلو" ، زي "شريف عرفة" و"علي عبد الخالق" في الثمانينيات و"أشرف فهمي" اللي له فيلم ضمن أفضل مائة فيلم مصري "ليل وقضبان" وله كام فيلم اجتماعي مهمين .. ومخرجين أصحاب مشاريع زي "عاطف الطيب" و "داوود عبد السيد" وكان "رضوان الكاشف" من وجهة نظر نقدية..

فيه عندنا تيار جارف في الميديا وفي الفكر السائد بيحتقر الأفلام الحلوة كصورة واللي مبتناقشش قضايا كبيرة وخالية من الشعارات وبيعظم في المخرجين الصنايعية اللي بيخرجوا الأفلام دي!

دة إيه .. دة رغم إنه من تاسع المستحيلات إن كل الإنتاج السينمائي حتى في أمريكا يطلع بمستوى ضخم شكلاً وموضوعاً..

malek el masry
12-28-2007, 05:03 PM
Red Alert,

شريف عرفة مش حرفي و بس

عنده افلام فكر و مضمون زي سمع هس و الدرجة الثالثة و يامهلبية يا و الارهاب و الكباب و المنسي

نفس الكلام علي عبد الخالق اللي عنده فيلم من اهم الافلام المصرية فيلم العار

و ايضا اشرف فهمي ليه افلام قوية في الفكر و المضمون و ممتعة سينمائيا في نفس الوقت زي فيلم ليل و قضبان وفيلم المجهول و فيلم الشريدة

عاطف الطيب ايضا قدم افلام بتمزج بين الفكر و جودة الصورة السينمائية زي الهروب و سواق الاتوبيس

محمد خان بقي معلم كبير: الحريف و زوجة رجل مهم و احلام هند و كاميليا و طائر علي الطريق و موعد علي العشاء و خرج ولم يعد و عودة مواطن افلام قوية مضمونا و ممتعة شكلا

رافت الميهي عمل فيلم للحب قصة اخيرة نفس النظام برضه

داود عبد السيد في الكيت كات و ارض الخوف نفس الحكاية

Red Alert
12-28-2007, 07:27 PM
قصدي صاحب مشروع بمعنى :

مشروع داوود عبد السيد ورضوان الكاشف الفئات المهمشة اللي تناولوها في "الكيت كات" و"ليه يا بنفسج" ..وما ننساش "مواطن ومخبر وحرامي".. ويشذ عن المشروع فيلم داوود عبد السيد "أرض الخوف".. اللي بيعتبر "حالة خاصة جداً" من وجهة نظري..

تخصص عاطف الطيب الطبقات الوسطى والدنيا والمجتمع المصري عموماً في مرحلة ما بعد الانفتاح "الحب فوق هضبة الهرم" ، "دماء على الأسفلت" ، "إنذار بالطاعة" ، "ضد الحكومة" وحتى اللايت كوميدي "الدنيا على جناح يمامة"..

ويشذ عن المجموعة أسامة فوزي اللي عدد أفلامه قليل ومش باين ملامح محددة لمشروع السينمائي ، لكنه مخرج تقيل أياً كانت خلافاتي مع مواضيع أفلامه..

إنما عرفة وفهمي وعبد الخالق ومعاهم من الجداد محمد ياسين بيعملوا سينما حلوة بصرياً لا أكثر ، ويمكن كمان يكون مدى تألقهم في الفيلم له علاقة بالسيناريو زيادة أو نقصاناً..

malek el masry
01-12-2008, 06:01 PM
جلست لساعات طويلة أمام شاشة الكمبيوتر أحاول أن أعبر عن المشاعر المتداخلة التى أصابنى بها فيلم خالد يوسف الكارثي الخطير (حين ميسرة)، دون اى جدوى. وبعد أن أعيتنى الحيل قررت إنى أشوف التليفزيون إذ ربما أجد مفتاحاً لمقال أو ماشابه. وبالفعل جاء المدد من شعبان عبد الرحيم الذى كان يشدو فى فيلم (مواطن ومخبر وحرامى) على قناة روتانا بتنويعة على إيقاعه المحبب. ماقاله شعبان يعبر من وجهة نظرى بشكل كامل عن جوهر فيلم خالد يوسف ولايستدعى الأمر أى تدخل أو تعليق من جانبنا:

الفن يا ناس رسالة....ضرورى يكون مفيد

بيوضح المشاكل...ميخليهاش تزيد

إيييييييييييه

بس خلاص

الطبقة الوسطى المصرية بتطور نزوع شبه فاشى بس لسة أهيف من إنه يجد منظرين أو مبدعين يعبروا عنه

بس أنا فى رأيى إنها مسألة وقت لغاية مانلاقى المظاهرات فى الشوارع بتطالب بإزالة أحزمة البؤس وحرق أهليها لأنهم عندهم الإيدز

The lion king
03-28-2008, 10:38 PM
فيلم طباخ الرئيس طلع مقلب مش زى ماكنت انا منتظر من طلعت زكريا ويوسف معاطى

فيلم سخيف وسطحى ودعائى ومرتعش

لا قصه ولا تمثيل ولا كوميديا ولا اخراج ولا حاجه ابدا

انا ما قدرتش اكمله اساسا

malek el masry
03-28-2008, 10:46 PM
The lion king,

ده فيلم عملته ادارة العلاقات العامة في القصر الجمهوري
:)

The lion king
03-28-2008, 10:47 PM
malek el masry,
:lol: :lol:

بس فيه اساءه ليه برضو ..هو ايه مش عارف حاجه خالص..نايم على ودانه

وكل مشهد ابقى حاسس انه عايز يعيط..عشان بيضحكوا عليه وبيخدعوه وهو مش عارف يعمل حاجه:)

فيه قائد وزعيم كده بالذمه

Us Palermo Lover
03-29-2008, 12:23 PM
الظاهر ان الفترة دي هنبدأ موجة افلام الرعب الامريكيه في السينما المصرية

Ahmad Hesham
03-29-2008, 12:53 PM
اه انا اخدت بالى
تقليد بالميللى
و اصلا الافلام الامريكانى دى فكسانة اخر حاجه
شويه شباب يتوهوا يلاقوا بيت
يموتوا و يتقتلوا فيه
!!
تيمة مملة اخر حاجه
انا شفت اعلان الفيلم الجديد
ما يفرقش حاجه عن الافلام الهولييدى

:)

amr farok
03-29-2008, 01:23 PM
فيلم حين ميسرة نزل دى فى دى

هل ينفع انزله هنا ؟؟؟؟؟؟؟؟

Us Palermo Lover
03-29-2008, 01:50 PM
Clemenza,

احنا بقي عندنا مرض التقليد الاعمي لهوليود .. حتي في الافيشات وطريقة وضع الاسامي مروروا بكام عربية اتقلبت علي شوية تفجيرات

الواحد بقي يستني بالسنتين والتلاته اما يشوف فيلم مصري .. بدأنا نفقد الهويه المصرية في السينما , حتي الافلام ذات الطابع المصري الموجودة دلوقتي حاجة في منتهي السذاجة والتفاهه بقيادة آل السبكي

الافلام النادرة الكويسة حتي بتلاقي البطل متواضع الموهبة زي فيلم الجزيرة امكانيات قوية وسيناريو قوي .. لكن تشوف فيلم البريء لاحمد زكي مثلا وقارن بين اداء وقدرات البطلين - ده ان صح تطابق الوصفين علي كلا منهما - , شتان الفارق .. فعلا

sabry sherif
03-29-2008, 02:29 PM
فيلم حين ميسرة نزل دى فى دى

هل ينفع انزله هنا ؟؟؟؟؟؟؟؟
حين ميسره

Ahmad Hesham
03-29-2008, 03:11 PM
amr farok,
يا راجل حرام عليك
ده فيلم قذر
لا فيه ابداع روائى ولا فنى ولا تمثيل ولا اى حاجه
فيلم قذر و وسخ
!!

elvis
03-29-2008, 04:02 PM
Clemenza,

احنا بقي عندنا مرض التقليد الاعمي لهوليود .. حتي في الافيشات وطريقة وضع الاسامي مروروا بكام عربية اتقلبت علي شوية تفجيرات

الواحد بقي يستني بالسنتين والتلاته اما يشوف فيلم مصري .. بدأنا نفقد الهويه المصرية في السينما , حتي الافلام ذات الطابع المصري الموجودة دلوقتي حاجة في منتهي السذاجة والتفاهه بقيادة آل السبكي

الافلام النادرة الكويسة حتي بتلاقي البطل متواضع الموهبة زي فيلم الجزيرة امكانيات قوية وسيناريو قوي .. لكن تشوف فيلم البريء لاحمد زكي مثلا وقارن بين اداء وقدرات البطلين - ده ان صح تطابق الوصفين علي كلا منهما - , شتان الفارق .. فعلا

:-x :-x :-x :-x
بس الصراحة حرام عليك تقارن بين احمد زكي واحمد السقا

elvis
03-29-2008, 04:16 PM
The lion king,

ده فيلم عملته ادارة العلاقات العامة في القصر الجمهوري
:)
الحمد لله متفرجتش علي الفيلم ومش هتفرج علية حتي لو اتعرض علي التلفزيون
مش هضيع وقتي مع شوية الافاقين دول خاصة ان الافاق مصطفي حسين اشاد بالفيلم

علي فكرة ياكينج انا مش لاقي فيلم سلطة بلادي خالص